កណ្តាលៈ សមត្ថកិច្ចស្រុកកោះធំ ខេត្ត កណ្តាល បានឃាត់ខ្លួនជនសង្ស័យម្្នាក់ បន្ទាប់ពីទទួលដំណឹងថា មុខសញ្ញាសង្ស័យខាងលើដែលជាជនសកម្មផងនោះ កំពុងឈរចែកចាយគ្រឿងញៀន។

ការឃាត់ខ្លួននេះ បានធ្វើឡើងកាលពីវេលាម៉ោង ៣ និង៤០នាទីរសៀល ថ្ងៃទី០៨ ខែសីហា ឆ្នាំ២០១៦នៅភូមិ ត្រពាំងជ្រៃ ឃុំ ឈើខ្មៅ ស្រុកកោះធំ ខេត្តកណ្ដាល ។

ជនសង្ស័យដែលសមត្ថកិច្ចឃាត់ខ្លួន ឈ្មោះ ណូយ គឹមស៊ ភេទ ប្រុស អាយុ ៣៥ ឆ្នាំ ជនជាតិខ្មែរ ទីលំនៅភូមិត្រពាំងជ្រៃ ឃុំឈើខ្មៅ ស្រុកកោះធំ ខេត្តកណ្ដាល មុខរបរ កសិករ ហើយវត្ថុតាងចាប់ដកហូតយករួមមាន ១/-ម៉្សៅក្រាមពណ៌សថ្លាសង្ស័យសារធាតុញៀន(ម៉ាទឹកកកIce) ចំនួន ០១ កញ្ចប់ធំ។ ២/-ថ្នាំពេទ្យគ្រាប់ពណ៌ស ចំនួន ០៤ គ្រាប់, ៣/-កំប៉ុងជ័រសម្រាប់ដាក់ថ្នាំញៀនចំនួន ០១, ៤/-សំបកថង់ផ្លាស្ទិចសម្រាប់វេចខ្ចប់ថ្នាំញៀនមួយចំនួន និង៥/-ឧបករណ៍សម្រាប់ច្រកថ្នាំញៀនចំនួន ០១។

សមត្ថកិច្ចបានឲ្យដឹងថា កាលពីពេលវេលាកើតហេតុខាងលើ កម្លាំងសមត្ថកិច្ចជំនាញនគរបាលស្រុកកោះធំ បានចល័តល្បាតក្នុងភូមិសាស្ត្រខ្លួនគ្រប់គ្រង ពេលនោះក៏បានទទួលព័ត៌មានពីមហាជនល្អថា មានការលក់គ្រឿងញៀនយ៉ាងសកម្មនៅចំណុចកើតហេតុខាងលើ។ ភ្លាមនោះកម្លាំងជំនាញបានសហការជាមួយកម្លាំងប៉ុស្ដិ៍រដ្ឋបាលជ្រោយតាកែវ និងប៉ុស្ដិ៍ឈើខ្មៅ ចុះស្រាវជ្រាវទៅដល់កន្លែងកើតហេតុខាងលើ ហើយបានឃាត់ខ្លួនជនសង្ស័យ ០១ នាក់ ឈ្មោះ ណូយ គឹមស៊ ភេទប្រុស អាយុ ៣៥ ឆ្នាំ និងត្រួតពិនិត្យរកឃើញថ្នាំញៀន(ម៉ាទឹកកក)ចំនួន ០១ កញ្ចប់ធំ រួមនិងសម្ភារៈវេចខ្ចប់មួយចំនួនទៀត ដែលជនសង្ស័យបានលាក់នៅក្នុងកំប៉ុងជ័រទុកនៅក្នុងគុម្ពឬស្សីខាងក្រោយផ្ទះរបស់ខ្លួន ។ រួចបាននាំខ្លួនជនសង្ស័យ និងវត្ថុតាងបញ្ជូនមកកាន់អធិការដ្ឋាននគរបាលស្រុកកោះធំដើម្បីសាកសួរចាត់ការតាមនីតិវិធី ។

ជនសង្ស័យ ណូយ គឹមស៊ បានឆ្លើយសារភាពថា ថ្នាំញៀនចំនួន ០១ កញ្ចប់ធំនេះ គឺពិតជារបស់ខ្លួនបានទិញយកមកទុកលក់ពិតប្រាកដមែន៕