កណ្ដាលៈ យោងតាមផេកការិយាល័យផ្សព្វផ្សាយតាមបណ្តាញសង្គមបានឲ្យដឹងថា នៅថ្ងៃសុក្រ១៥កើត ខែអស្សុជ ឆ្នាំជូតទោស័ក ព.ស.២៥៦៤ ត្រូវនឹងថ្ងៃទី០២ ខែតុលា ឆ្នាំ២០២០ វេលាម៉ោង១៩និង៥០នាទីមានករណីគ្រោះថ្នាក់ចរាចរណ៍ផ្លូវគោករវាងរថយន្តនិងម៉ូតូ បណ្តាលឲ្យរបួសធ្ងន់ប្រុស០២នាក់ ខូចខាតម៉ូតូ០១ គ្រឿងនិងរថយន្ត០១គ្រឿងនៅលើផ្លូវជាតិលេខ៦ ត្រង់ចំណុចមុខផ្សារព្រែកអញ្ចាញ ស្ថិតនៅក្នុងភូមិភូមិក្រោម ឃុំព្រែកអញ្ចាញ ស្រុកមុខកំពូល ខេត្ដកណ្ដាល។

នៅថ្ងៃកើតហេតុខាងលើមានរថយន្តមួយគ្រឿងម៉ាក ហ៊ីយិនដាយ ពណ៌ខៀវ ពាក់ផ្លាកលេខ ភ្នំពេញ 2AA0013 បើកបរដោយឈ្មោះ លិច ណាក់ ភេទប្រុស អាយុ២៩ ឆ្នាំមានទីលំនៅភូមិយស់ជោ ឃុំជើងរស់ ស្រុកឧដ្ដុង្គ ខេត្តកំពង់ស្ពឺ។ ធ្វើដំណើរពីត្បូងទជើង លុះមកដល់ចំណុចមុខផ្សារព្រែកអញ្ចាញបានឈប់នៅលើទ្រូងផ្លូវ បណ្ដាលឲ្យម៉ូតូមួយគ្រឿងម៉ាក ហុងដា C125 ពណ៌ខ្មៅពាក់ផ្លាកលេខ ភ្នំពេញ 1BG7516 បើកបរដោយ (មិនស្គាស់អត្តសញ្ញាណ) ភេទប្រុស ដោយមានរួមដំណើរម្នាក់ (មិនស្គាល់អត្តសញ្ញាណ) ភេទប្រុស ធ្វើដំណើរពីត្បូងទៅជើង ហើយបានមកបុករថយន្តម៉ាក ហ៊ីយិនដាយ ដែលឈប់នៅលើទ្រូងផ្លូវខាងលើ បណ្ដាលឲ្យរបួសធ្ងន់ដល់អ្នកបើកបរម៉ូតូ និងអ្នករួមដំណើរ ហើយបានបញ្ជូនទៅពេទ្យភ្នំពេញ។

ក្រោយពីទទួលបានពត៌មានកម្លាំងប៉ុស្តិ៍ព្រែកអញ្ចាញ និងកម្លាំងជំនាញ បានចុះទៅដល់កន្លែងកើតហេតុនិងវាស់វែង ។ បច្ចុប្បន្ន​អ្នកបើកបររថយន្ត​ និងមធ្យោបាយដែលពាក់ព័ន្ធ បានបញ្ជូនមកកាន់អធិការដ្ឋាននគរបាលស្រុកមុខកំពូល​ ដើម្បីចាត់ការតាមនីតិវិធីច្បាប់៕