ផ្ទះ ព័ត៌មានជាតិ លម្អិត៖ ករណីរ...

លម្អិត៖ ករណីរថយន្ត​ដឹក​ជនជាតិ​វៀតណាម​ឆ្លង​ដែនទៅប្រទេសថៃ​ក្រឡាប់​ នៅ​ស្រុក​ជីក្រែង​ បណ្តាល​ឲ្យ​ស្លាប់​មនុស្ស​ ៧​នាក់​

0

​សៀមរាប: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា រថយន្ត១គ្រឿង ខណ:កំពុងធ្វើដំណើរដឹកជញ្ជូនជនជាតិវៀតណាមឆ្លងដែន ទៅកាន់ប្រទេសថៃ បានជួបគ្រោះថ្នាក់ក្រឡាប់ធ្លាក់ប្រឡាយ បណ្តាល​ឲ្យ​ស្លាប់​មនុស្ស​ចំនួន​០៧​នាក់​(​ស្រី​០៣​នាក់​)​ រងរ​បួ​សស្រាល​ចំនួន​០៥​នាក់​(​ស្រី​០២​នាក់​)​ ។​

ហេតុការណ៍នេះកើតឡើងនា​វេលា​ម៉ោង ​០២​និង​៤០​នាទី​ព្រឹក​ ថ្ងៃ​ទី​០៦​ ខែវិច្ឆិកា​ ឆ្នាំ​២០២០​ នៅ​លើ​ផ្លូវជាតិ​លេខ​៦​ ត្រង់​ចំណុច​ស្ពាន​ក្រចាប់​ ចន្លោះ​គីឡូម៉ែត្រ​លេខ​២៤៦-២៤៧​ ស្ថិត​នៅ​ភូមិ​ ស្ពាន​ត្នោត​១​ ឃុំ​ស្ពាន​ត្នោត​ ស្រុក​ជីក្រែង​ ខេត្តសៀមរាប​ ។

​ក្រោយ​កើតហេតុ​សមត្ថកិច្ច​បាន​ចុះ​អន្តរាគមន៍​ ពិនិត្យ​ឃើញ​ថា​ ជនជាតិ​វៀតណាម​ ទាំង​១១​នាក់​នេះ​សុទ្ធសឹងតែ​លួច​ឆ្លង​ដែន​ចូល​មក​ព្រះរាជាណាចក្រ​កម្ពុជា​ដោយ​គ្មាន​ការ​អនុញ្ញាត ​(​មាន​លិខិតឆ្លងដែន​-​គ្មាន​ប្រថាប់ត្រា​ច្រក​ទ្វារ​)​។​

​លោក​ឧត្តមសេនីយ៍ត្រី​ ជា​ គឹ​ម​សាន្ត​ ស្នងការ​រង​ទទួល​ការងារ​ផែន​អន្តោប្រវេសន៍​បានឲ្យដឹង​ថា​៖​ ពួក​គេ​រស់នៅ​ខេត្ត​ហា​ទិញ​ ប្រទេស​វៀតណាម​ ត្រូវ​បាន​មេខ្យល់​ម្នាក់​មិន​ស្គាល់ឈ្មោះ​ ជនជាតិ​វៀតណាម​ ណែនាំ​ឲ្យ​ទៅ​ធ្វើការ​រកស៊ី​នៅ​ប្រទេស​ថៃ​ ដោយ​លួច​ឆ្លង​ដែន​ពី​ប្រទេស​វៀតណាម​ ចូល​មក​កម្ពុជា​ និង​បន្ត​ទៅ​ប្រទេស​ថៃ​ ប៉ុន្តែ​ត្រូវ​ចំណាយ​ប្រាក់​ចំនួន​ ១៥,០០០,០០០​ ដុ​ង​ក្នុង​ម្នាក់ៗ​ ។​ រហូត​ដល់​ថ្ងៃ​ទី​០៤​ ខែវិច្ឆិកា​ ឆ្នាំ​២០២០​ ពួក​គេ​ក៏​បាន​ធ្វើ​ដំណើរ​ពី​ខេត្ត​ហា​ទិញ​ មក​កាន់​ក្រុង​ហាណូយ​។​

​ពេល​មក​ដល់​មេខ្យល់​ម្នាក់​នោះ​បាន​មក​ទទួល​ពួក​គេ​ទៅ​ស្នាក់​នៅ​សណ្ឋាគារ​មួយ​កន្លែង​មិន​ចាំ​ឈ្មោះ​ បន្ទាប់​មក​ពួក​គេ​ក៏​បាន​ប្រគល់​ប្រាក់​ចំនួន​ ១,៥០០,០០០​ ដុ​ង​ក្នុង​ម្នាក់ៗ​ឲ្យ​ទៅ​មេខ្យល់​នោះ​ ។​

​បន្ទាប់​ពី​ទទួល​បាន​លុយ​គ្រប់​ចំនួន​ហើយ​ នា​រសៀល​ថ្ងៃ​ទី​០៥​ ខែវិច្ឆិកា​ ឆ្នាំ​២០២០​ មេខ្យល់​នោះ​ក៏បាន​ឲ្យ​រថយន្ត​មួយ​គ្រឿង​ដឹក​ពួក​គេ​ មក​ដល់​ខេត្ត​តៃ​និ​ញ​ នា​វេលា​ម៉ោង​១៩​និង​០០​នាទី​ ហើយ​ក៏​មាន​ម៉ូតូ​ចំនួន​០៦​គ្រឿង​រង់ចាំ​ទទួល​ និង​ដឹក​ពួក​គេ​លួច​ឆ្លង​ដែន​ចូល​មក​ព្រះរាជាណាចក្រ​កម្ពុជា​ ដោយ​ធ្វើ​ដំណើរ​កាត់​តាម​ចម្ការ​កៅស៊ូ​ (​ម៉ូតូ​ទាំង​០៦​គ្រឿង​នោះ​បិទ​ភ្លើង​ទាំងអស់​)​រយ:ពេល​ប្រហែល​៣០​នាទី​ ក៍​មាន​រថយន្ត​មួយ​គ្រឿង​ទៀត​(​រថយន្ត​ដែល​ជួប​គ្រោះថ្នាក់​)​បើកបរ​ដោយ​ជនជាតិ​ខ្មែរ​ មក​ទទួល​ពួក​គេ​ធ្វើ​ដំណើរ​បន្ត​ទៅ​ប្រទេស​ថៃ​។​

​តាម​ពួក​គេ​ដឹង​គឺ​ធ្វើ​ដំណើរ​ចេញពី​ខេត្ត​ត្បូងឃ្មុំ​ ឆ្ពោះទៅ​ ឡែ​ម​ ស្រុក​ភ្នំព្រឹក​ ខេត្តបាត់ដំបង​ រួច​លួច​ឆ្លង​ដែន​ចូល​ទៅ​ប្រទេស​ថៃ​។​

​ជនជាតិ​វៀតណាម​ដែល​នៅ​រស់​ចំនួន​០៥​នាក់​នេះ​មានឈ្មោះ​ដូច​ខាងក្រោម​៖
១-​ឈ្មោះ​ TRUONG​ THI​ KHUYEN​ ភេទ​ស្រី​ កើត​ថ្ងៃ​ទី​១២-០២-១៩៨២​ ជនជាតិ​វៀតណាម​ កាន់​លិខិតឆ្លងដែន​លេខ​C៦១០៤៩៧៣​។​
២-​ឈ្មោះ​ PHAN​ THI​ VAN​ ភេទ​ស្រី​ កើត​ថ្ងៃ​ទី​០៥-០៥-១៩៨៤​ ជនជាតិ​វៀតណាម​ កាន់​លិខិតឆ្លងដែន​លេខ​ C៧០៣៣៩២២​។​
៣-​ឈ្មោះ​ HOANG​ QUOC​ TUAN​ ភេទ​ប្រុស​ កើត​ថ្ងៃ​ទី​១៦-០៦-១៩៧៩​ ជនជាតិ​វៀតណាម​ កាន់​លិខិតឆ្លងដែន​លេខ​C៥៥៥៩៣១០​។​
៤-​ឈ្មោះ​ DANG​ VAN​ VINH​ ភេទ​ប្រុស​ កើត​ថ្ងៃ​ទី​១០-០៣-១៩៨១​ ជនជាតិ​វៀតណាម​ កាន់​លិខិតឆ្លងដែន​លេខ​ C៩៣៧៣២៨៤​។​
៥-​ឈ្មោះ​ PHAM​ VIET​ LOI​ ភេទ​ប្រុស​ កើត​ថ្ងៃ​ទី​១៤-០៣-១៩៨១​ ជនជាតិ​វៀតណាម​ លិខិតឆ្លងដែន​បាត់​ ។​

សាកសព​ជន​រង​គ្រោះ​ទាំង​ ០៧​នាក់​ ត្រូវ​បាន​សមត្ថកិច្ច​បញ្ជូន​ទៅ​តម្កល់​បណ្តោះអាសន្ន​នៅ​វត្ត​ស្ទឹង​មាន​ជ័យ​ រាជធានី​ភ្នំពេញ​ ៕

មតិយោបល់