កណ្ដាល: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នគរបាលក្រុងតាខ្មៅឃាត់ខ្លួន ជនសង្ស័យម្នាក់ ករណីលួចលុយ និងខ្សែ.កលោកយាយម្នាក់ កាលពីថ្ងៃទី២១ ខែវិច្ឆិកា ឆ្នាំ២០២០ វេលាម៉ោង៩និង៣០នាទី ចំណុចភូមិស្វាយពងអង្ក្រង សង្កាត់កោះអន្លង់ចិន ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅ បានឲ្យដឹងថា លោកយាយរងគ្រោះឈ្មោះ ហាក់ អៀង អាយុ៨៨ឆ្នាំ ជនជាតិខ្មែរ មុខរបរជរា មានទីលំនៅភូមិ/សង្កាត់កើតហេតុ ។
ចំណែកជនសង្ស័យឈ្មោះ ស៊ុន រ៉ូសេត ភេទប្រុស អាយុ៤០ឆ្នាំ ជនជាតិខ្មែរ មុខរបរលក់ថ្នាំខ្មែរ មានទីលំនៅភូមិសន្សំកុសល្យ១ សង្កាត់បឹងទំពុន ខណ្ឌមានជ័យ រាជធានី ភ្នំពេញ (ឃាត់ខ្លួន)។
ដោយឡែកវត្ថុតាងចាប់យក៖ ខ្សែកធ្វើអំពីលោហធាតុពណ៌លឿង១ខ្សែទម្ងន់៥ជី, ប្រាក់រៀល ២០ម៉ឺនរៀល, ប្រាក់ដុល្លារ៥៧០ដុល្លារ, ម៉ូតូ១គ្រឿងម៉ាកHonda c125 ពណ៌ខ្មៅ ស៊េរី២០១៩ ផ្លាកលេខ ភ្នំពេញ 1HI-0518, ទូរសព្ទ័ដៃ១គ្រឿង, សាមីដាក់ឯកសារ១, សៀវភៅ១ក្បាល, តែចិន ៩កញ្ចប់, ឱសថបុរាណ(ថ្នាំខ្មែរ)១កញ្ចប់និងកាបូបយួពណ៌ក្រហម១ ។
ប្រភពដដែលបន្តថា នៅថ្ងៃខែឆ្នាំវេលាម៉ោងកើតហេតុ ជនសង្ស័យ បានជិះម៉ូតូមកផ្ទះជនរងគ្រោះ ដើម្បីលក់ឱសថបុរាណថ្នាំខ្មែរ(ថ្នាំលើសឈាម) ឲ្យជនរងគ្រោះ ពេលនោះបានឲ្យជនរងគ្រោះស្គែនមេដៃលើទូរសព្ទ័.ដើម្បីពិនិត្យរកជំងឺលើសឈាម ខណ:នោះក៏ឃើញជនរងគ្រោះមានខ្ចប់កូនថង់ដាក់លុយនិងខ្សែក១ថង់ ដាក់នៅក្នុងហោប៉ៅអាវ ដោយឃើញឱកាសល្អស្ងាត់ ម្យ៉ាងទៀតឃើញជនរងគ្រោះជាមនុស្សចាស់ជរា បានបន្លំលូកយក ហើយជិះម៉ូតូចេញបាត់ទៅ។ បន្ទាប់មក ជនរងគ្រោះបានប្រាប់ចៅនិងកូន ហើយរាយការណ៍ជូនសមត្ថកិច្ចប៉ុស្តិ៍កោះអន្លង់ចិន ដើម្បីអន្តរាគមន៍ រហូតចាប់ខ្លួនជនសង្ស័យបានតែម្ដង ។
បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលក្រុងតាខ្មៅ ដើម្បីបន្តចាត់ការតាមនីតិវិធី ៕
មតិយោបល់