ស្វាយរៀងៈ ក្រោយពីសមត្ថកិច្ថករិយាល័យប្រឆាំងគ្រឿងញៀនស្នងការដ្ឋាននគបាលខេត្តបានដឹកនាំកម្លាំងចុះបង្ក្រាបក្រុមជួញដូរ និងប្រើប្រាស់គ្រឿងញៀន រហូតឈានដល់ការឃាត់ខ្លួនជនសង្ស័យបាន៣នាក់ និងថ្នាំញៀនមេតំហ្វេតាមីន(ម៉ាទឹកកក) ចំនួន២កញ្ចប់ (ធំ១កញ្ចប់តូច១កញ្ចប់) ដកហូតបានម៉ូតូចំនួន២គ្រឿង និងទូរស័ព្ទដៃចំនួន០៣គ្រឿងនាវេលាម៉ោង២រសៀលថ្ងៃទី១០ សីហា សមត្ថកិច្ចបានកសាងសំណុំរឿងបញ្ជូនជនសង្ស័យ២នាក់បញ្ជូនទៅសាលាដំបូងខេត្តដើម្បីចាត់ការតាមនីតិវិធីច្បាប់។

ប្រតិបត្តិការចុះបង្ក្រាបក្រុមជួញដូរ និងប្រើប្រាស់គ្រឿងញៀនបានធ្វើឡើងកាលពីវេលាម៉ោង៨យប់ថ្ងៃទី០៩ សីហា នៅចំណុចខាងត្បូងមន្ទីអប់រំយុវជននិងកីឡាខេត្ត ស្ថិតនៅភូមិស្រះវង្ស សង្កាត់ស្វាយរៀងក្រុងស្វាយរៀង។

លោកវរសេនីយ៍ទោ កាន កេន នាយការិយាល័យប្រឆាំគ្រឿងញៀនស្នងការដ្ឋាននគបាលខេត្តបានឲ្យដឹងថា ជនសង្ស័យត្រូវបានឃាត់ខ្លួនជាបន្តបន្ទាប់ ទី១ឈ្មោះ នុត ថាច់ ភេទប្រុស អាយុ៣២ឆ្នាំមុខរបរ ជាងបិតឈើតុកទូ មានទីលំនៅភូមិស្វាយរៀង សង្កាត់ស្វាយរៀង ក្រុងស្វាយរៀង។ ទី២.ឈ្មោះ ជាសន្ធិ វាសនា ភេទប្រុស អាយុ២៧ឆ្នាំ មានទីលំនៅភូមិកៀនសាំង សង្កាត់ស្វាយរៀង ក្រុងស្វាយ។ ទី៣.ឈ្មោះ វុទ្ធី ភេទប្រុស អាយុ៣៦ឆ្នាំ មុខរបរអ្នកបើកបររថយន្តតាក់ស៊ី មានទីលំនៅភូមិថ្មី សង្កាត់សង្ឃ័រ ក្រុងស្វាយរៀង។

បន្ទាប់ពីឃាត់ខ្លួននៅម៉ោង២រសៀលថ្ងៃទី១០ សីហា សមត្ថកិច្ចបានកសាងសំណុំរឿងបញ្ជូនជនសង្ស័យ២នាក់ រួមទាំងវត្ថុតាងបញ្ជូនទៅសាលាដំបូងខេត្តចាត់ការតាមនីតិវិធីច្បាប់។ ដោយឡែកអ្នករត់តាក់ស៊ីសមត្ថកិច្ចបានធ្វើការអប់រំ និងបានដោះលែងឲ្យត្រឡប់ទៅផ្ទះវិញ៕