កណ្តាល: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសម្នាក់ត្រូវបានកម្លាំងនគរបាលប៉ុស្តិ៍អន្លង់ចិនចុះអន្តរាគមន៍ឃាត់ខ្លួន បញ្ជូនមកកាន់អធិការដ្ឋាននគរបាលក្រុងតាខ្មៅ ពាក់ព័ន្ធករណីហិង្សាដោយចេតនា (យកស្នាប់ដៃវាយប្អូនបង្កើតបណ្តាលឲ្យបែបក្បាល) ។
ហេតុការណ៍នេះកើតឡើងនៅថ្ងៃទី៣ ខែមករា ឆ្នាំ២០២១ វេលាម៉ោង២១និង៣០នាទី ចំណុចភូមិក្បាលកោះ សង្កាត់កោះអន្លង់ចិន ក្រុងតាខ្មៅខេត្តកណ្តាល ។
ជនរងគ្រោះឈ្មោះ សាត កុសល ភេទប្រុស អាយុ៣០ឆ្នាំ ទីលំនៅ ភូមិក្បាលកោះ សង្កាត់កោះអន្លង់ចិន ក្រុងតាខ្មៅ ខេត្តកណ្តាល មុខរបរ កសិករ។
ដៃដល់ឈ្មោះសាត សែន ភេទប្រុស អាយុ៣២ឆ្នាំ ទីលំនៅ ភូមិក្បាលកោះ សង្កាត់កោះអន្លង់ចិន ក្រុងតាខ្មៅ ខេត្តកណ្តាល មុខរបរ មិនពិតប្រាកដ(ឃាត់ខ្លួន)។
វត្ថុតាងចាប់យក៖ -ស្នាប់ដៃធ្វើអំពីដែកដឺរ៉ា០១ -ទូរស័ព្ទដៃ១គ្រឿងម៉ាកNចុចពិល។
ប្រភពព័ត៌មានបានឲ្យដឹងថា នៅវេលាកើតហេតុខាងលើ ពេលដែលជនរងគ្រោះជាប្អូនបង្កើតមកពីរកត្រី មកដល់ផ្ទះវិញ ស្រាប់ឃើញជនសង្ស័យជាបងបង្កើត កំពុងតែស្រែកឡូឡាជេរគេ ជេរឯងមិនដឹងមូលហេតុ ពីព្រោះជនសង្ស័យជាមនុស្សប្រើប្រាស់គ្រឿងញៀនជាប្រចាំ ។ ឃើញដូចនេះ ជនរងគ្រោះបានទៅឃាត់ជនសង្ស័យកុំឲ្យស្រែកឡូឡារំខានអ្នកជិតខាងដេក យប់ហើយ ធ្វើឲ្យជនសង្ស័យខឹងបានស្ទុះទៅយកស្នាប់ដៃធ្វើអំពីដែកដឺរ៉ាវាយទៅលើជនរងគ្រោះបណ្តាល ឲ្យរងរបួសចំក្បាល០២កន្លែង និងចំលើថ្ងាសខាងឆ្វេង១កន្លែងរយះហូរឈាម ។
ភ្លាមនោះ ជនរងគ្រោះបានប្តឹងសមត្ថកិច្ចនគរបាលប៉ុស្តិ៍កោះអន្លង់ចិនចុះជួយអន្តរាគមន៍ឃាត់ខ្លួនជនសង្ស័យរួមទាំងដកហូតវត្ថុតាងបញ្ជូនបន្តមកកាន់អធិការដ្ឋាននគរបាលក្រុងតាខ្មៅ ដើម្បីចាត់ការបន្តតាមនីតិវិធី ៕
មតិយោបល់