បាត់ដំបង: យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា យុវជនម្នាក់ ដែលបើកម៉ូតូក្នុងល្បឿនលឿន គ្មានពាក់មួកសុវត្ថិភាព ហើយបានទៅបុកគោយន្តកន្ត្រៃ បណ្តាលឲ្យធ្លាយពោះស្លាប់ភ្លាមៗ នៅនឹងកន្លែងកើតហេតុ ។ ចំណែកអ្នកបើកគោយន្តកន្ត្រៃ ឃើញសភាពបែបនោះ បានទុកគោយន្តចោល រត់គេចខ្លួនបាត់ ។
ហេតុការណ៍នេះ បានកើតឡើងនៅលើផ្លូវជាតិលេខ៥ កំពុងស្ថាបនា ត្រង់ចំណុចក្រុមទី៦១ ភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង កាលពីថ្ងៃទី០៦ ខែកុម្ភ: ឆ្នាំ២០២១ វេលាម៉ោង១៨និង៥០នាទី ។
លោកវរសេនីយ៍ឯក ផង់ សុភាព អធិការនគរបាលស្រុកថ្មគោល បានរាយការណ៍ ឲ្យដឹងថា មានគោយន្តកន្ត្រៃសណ្តោងរ៉ឺម៉កដឹកស្រូវមួយគ្រឿង បើកចេញពីផ្លូវលំ ទិសដៅពីលិចទៅកើតដល់ចំណុចកើតហេតុ បានបើកឡើងលើផ្លូវជាតិលេខ៥ ហើយបត់ស្តាំទៅទិសខាងត្បូង ស្រាប់តែមានម៉ូតូម៉ាកស្កុបពី ពណ៌ស ស៊េរី២០២១ គ្មានផ្លាកលេខ បើកពីទិសខាងជើងទៅត្បូងក្នុងល្បឿនលឿន បានបុកគោយន្តកន្ត្រៃកំពុងបត់ស្តាំចំដៃគោយន្ត បណ្តាលឱ្យអ្នកបើកបរម៉ូតូរងរបួសធ្លាយពោះស្លាប់នៅកន្លែងកើតហេតុ ចំណែកគោយន្តកន្ត្រៃបានចតចោល អ្នកបើកបររត់គេចខ្លួនបាត់។ អ្នកបើកបរគោយន្តកន្ត្រៃមិនស្គាល់អត្តសញ្ញាណ (រត់គេចខ្លួន)។
ជនរងគ្រោះអ្នកបើកបរម៉ូតូឈ្មោះ វឿន សាវុធ ភេទប្រុស អាយុ២៥ឆ្នាំ រស់នៅភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង បានស្លាប់បាត់បង់ជីវិត (គ្មានមួកសុវត្ថិភាព)។
ករណីនេះ ដោយបានឯកភាពពីជំនាញខេត្តបានប្រគល់សពជនរងគ្រោះឱ្យក្រុមគ្រួសារ ចាត់ចែងធ្វើបុណ្យតាមប្រពៃណី ហើយជំនាញធ្វើវាស់វែងបានត្រឹមត្រូវ និងដកហូតសម្ភារតាងបង្កទាំងសងខាង យកមករក្សាទុកនៅអធិការដ្ឋាននគរបាលស្រុកថ្មគោល ដើម្បីកសាងសំណុំរឿងចាត់ការតាមនីតិវិធី៕
មតិយោបល់