ផ្ទះ ព័ត៌មានជាតិ ម៉ូតូ ២គ្រឿងប...

ម៉ូតូ ២គ្រឿងបុកគ្នា បណ្ដាលឲ្យមនុស្ស ៦នាក់ រងរបួសធ្ងន់ស្រាល នៅស្រុកបាកាន

0

ពោធិ៍សាត់: កាលពីថ្ងៃទី៧ ខែកុម្ភ: ឆ្នាំ២០២១ វេលាម៉ោង ៤និង៣០នាទីរសៀល មានករណីគ្រោះថ្នាក់ចរាចរណ៍ដោយម៉ូតូបុកម៉ូតូ នៅលើផ្លូវក្រាលកៅស៊ូ ស្ថិតភូមិរូង ឃុំបឹងខ្នារ ស្រុកបាកាន បណ្តាលឲ្យមនុស្សចំនួន ៦នាក់ ស្រី ២នាក់ រងរបួសធ្ងន់ស្រាល បង្កឲ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះពិនិត្យដល់កន្លែងកើតហេតុ។

សាក្សីនៅកន្លែងកើតហេតុបានឲ្យដឹងថា គេបានឃើញម៉ូតូធន់C125 ពណ៌ខ្មៅស៊េរីឆ្នាំ២០១៣ ពាក់ផ្លាកលេខ ពោធិ៍សាត់ 1E-2344 បើកបរពីទិសខាងកើតទៅលិចដោយឈ្មោះ ណម សុផាត់ ភេទប្រុស អាយុ ៣៩ឆ្នាំ រស់នៅភូមិចាយ៉ូវ ឃុំមេទឹក ស្រុកបាកាន (របួសស្រាល) និងអ្នករួមដំណើរជិះពីក្រោយ៖
១-ឈ្មោះ ស៊ន ធាង ភេទស្រី អាយុ ១៨ឆ្នាំ រស់នៅភូមិជាមួយគ្នា (របួសស្រាល)។
២-ឈ្មោះ ឆាយ គា ភេទស្រី អាយុ ៥៤ឆ្នាំ រស់នៅភូមិជាមួយគ្នា (របួសធ្ងន់)។ លុះបើកបរដល់ចំណុចកើតហេតុខាងលើបាន បុកម៉ូតូម៉ាក ស៊ូមមើអិច ពណ៌ស្វាយ ពាក់ផ្លាកលេខ ពោធិ៍សាត់ 1L-6477 ដែលបើកឆ្លងផ្លូវពីទិសខាងជើងទៅត្បូង ដោយឈ្មោះ ប៊ុន វណ្ណហៀប ភេទប្រុស អាយុ ១៣ឆ្នាំ រស់នៅភូមិព្រះម្លូរ ឃុំបឹងខ្នារ ស្រុកបាកាន (របួសស្រាល) និងអ្នករួមដំណើរជិះពីក្រោយ៖
១-ឈ្មោះ ប៊ុន វណ្ណ: ភេទប្រុស អាយុ ៣ឆ្នាំ រស់នៅភូមិជាមួយគ្នា (របួសស្រាល)។
២-ឈ្មោះ ឈាង ឆាង ភេទប្រុស អាយុ ១៣ឆ្នាំ រស់នៅភូមិរូង ឃុំបឹងខ្នារ ស្រុកបាកាន (របួសស្រាល)។ ក្រោយពេលកើតហេតុគេបានបញ្ជូនអ្នករងរបួសទៅកាន់មន្ទីរពេទ្យបង្អែកបាកាន។

មន្រ្តីនគរបាលប៉ុស្តិ៍រដ្ឋបាលបឹងខ្នារបានបញ្ជាក់ថា ករណីគ្រោះថ្នាក់ចរាចរណ៍នេះបណ្តាលមកពីកត្តាល្បឿន និងការមិនប្រុងប្រយ័ត្ន។ រីឯវត្ថុតាងទាំងពីរត្រូវបានសមត្ថកិច្ច យកមករក្សាទុកនៅប៉ុស្តិ៍នគរបាលរដ្ឋបាល
បឹងខ្នារដើម្បីចាត់ការទៅតាមនីតិវិធី៕

មតិយោបល់