ផ្ទះ ព័ត៌មានជាតិ ក្មួយប្រុសយកដ...

ក្មួយប្រុសយកដំបងសំពងឪពុកមា ព្រោះស្ដីបន្ទោសរឿង រើជជុះសំលៀកបំពាក់

0

បាត់ដំបង: យោងតាមផេកការិយាល័យផ្សព្វផ្សាយ តាមបណ្តាញសង្គម នៅថ្ងៃ​ទី១២​ ខែកុម្ភ:​ ឆ្នាំ​២០២១​ វេលាម៉ោង ១៩និង០០នាទី​ ត្រង់ចំណុចតាពេក ក្រុមទី៥ ភូមិព្រះស្រែ ឃុំស្នឹង ស្រុកបាណន់ មានករណីហិង្សាដោយចេតនា មានស្ថានទម្ងន់ទោស​ (ប្រើប្រាស់អាវុធ)​ មួយកើតឡើង​ដោយក្មួយបង្កើតបានប្រើដំបងវាយសំពង ទៅឪពុកមារបស់ខ្លួន បណ្តាលឲ្យរងរបួសធ្ងន់ធ្ងរ។

លោកវរសេនីយ៍ឯក​ ប៉ាន់​ វ៉ាន់នី​ អធិការនគរបាល​ស្រុកបាណន់​ បានរាយការណ៍​ឲ្យដឹងថា​ ក្មួយប្រុសជាជនដៃដល់មានឈ្មោះ​ ស៊ឹម រ៉ាវី ហៅ វ៉ិត ភេទប្រុស អាយុ ២៧ឆ្នាំ រស់នៅចំណុចតាពេក ក្រុមទី៥ ភូមិព្រះស្រែ ឃុំស្នឹង ស្រុកបាណន់ បានប្រើប្រាស់ដំបងវាយទៅលើមារបស់ខ្លួនឈ្មោះ យី ស ភេទប្រុស អាយុ ៥៩ឆ្នាំ រស់នៅភូមិឃុំជាមួយគ្នា​ (ផ្ទះក្បែរគ្នា) បណ្ដាលឲ្យរបួសជាទម្ងន់​។

មូលហេតុ​ជនល្មើសខឹងនឹងឈ្មោះ យី ស ជាឪពុកមាស្ដីបន្ទោសរឿង រើជជុះសំលៀកបំពាក់នៅផ្ទះរបស់ខ្លួន ក្នុងពេលឲ្យជនល្មើសចាំផ្ទះឲ្យខ្លួន។

ក្រោយកើតហេតុ ជនរងគ្រោះ ត្រូវបានបញ្ជូនសង្គ្រោះនៅមន្ទីរពេទ្យ។ ចំណែកឯជនសង្ស័យ បានរត់គេចខ្លួន ទៅឡើងបង្គោលបណ្ដាញខ្សែភ្លើង​ ដែលនាំចរន្តអគ្គិសនីទៅរោងចក្រស៊ីម៉ងត៍ភ្នំដូនមាយ​ ទើបសមត្ថកិច្ច ក៏បានរិះរកវិធីឲ្យជនល្មើស ចុះមកវិញដើម្បីចាប់ខ្លួន។​
លុះដល់វេលាម៉ោង ២២និង៥០នាទី​ នៅថ្ងៃដដែលជនសង្ស័យ ត្រូវនគបាលស្រុកចាប់ខ្លួន បន្ទាប់ពីចុះពីបង្គោលភ្លើងមកវិញ​ ដើម្បីកសាងសំណុំរឿងបញ្ជូនទៅសាលាដំបូងខេត្ត ចាត់ការបន្តតាមនីតិវិធី៕

មតិយោបល់