ផ្ទះ ព័ត៌មានជាតិ រាយខ្សែលួសឆក់...

រាយខ្សែលួសឆក់កណ្តុរនៅវាលស្រែ បណ្តាលឲ្យបុរសម្នាក់ ដើរទាក់ឆក់ស្លាប់

0

​បាត់ដំបង:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា មាន​ករណី​មនុស្សឃាត​ដោយ​អ​ចេតនា​ បង្ក​ដោយ​បុរស​ម្នាក់​ដើរ​ទាក់​នឹង​ខ្សែ​រលួស​មាន​ចរន្តអគ្គិសនី ​ដែល​គេ​រាយ​សម្រាប់​ឆក់​សត្វ​ បណ្ដាល​ឲ្យ​ឆក់​ស្លាប់​បាត់បង់​ជីវិត​ ។​

​ហេតុការណ៍​នេះ​កើតឡើង​នៅ​ថ្ងៃ​ទី​១៧​ ខែកុម្ភ:​ ឆ្នាំ​២០២១​ វេលា​ម៉ោង​០១​និង​០០​នាទី​រំលង​អ​ធ្រា​ត្រ​ នៅ​ចំណុច​ភូមិ​ម៉ាក់​ឃ្លឿ​ ឃុំ​ព្រៃ​ខ្ពស់​ ស្រុក​ប​វេ​ល​ ។​

​លោក​វរសេនីយ៍ឯក​ សុខ​ សា​រិ​ន​ អធិការ​នគរបាល​ស្រុក​ប​វេ​ល​ បានឲ្យ​ដឹង​ថា​ ករណី​នេះ​បង្ក​ឡើង​ដោយ​ជនសង្ស័យ​ចំនួន​០២​នាក់​ ១.​ឈ្មោះ​ គុណ​ ឃួ​ន​ ភេទ​ប្រុស​ អាយុ​៥៨​ឆ្នាំ​ (​ត្រូវជា​ឪពុក​)​ និង​២.​ឈ្មោះ​ ឃួ​ន​ ចំណាប់​ ភេទ​ប្រុស​ អាយុ​២៩​ឆ្នាំ​ (​ត្រូវជា​កូន​)​ អ្នក​ទាំង​ពីរ​រស់នៅ​ភូមិ​ម៉ាក់​ឃ្លឿ​ ឃុំ​ព្រៃ​ខ្ពស់​ ស្រុក​ប​វេ​ល​ ។​ ចំណែក​ជន​រង​គ្រោះ​ឈ្មោះ​ ឡើយ​ លួ​យ​ ភេទ​ប្រុស​ អាយុ​៣៣​ឆ្នាំ​ មាន​ទីលំនៅ​ភូមិ​ម៉ាក់​ឃ្លឿ​ ឃុំ​ព្រៃ​ខ្ពស់​ ស្រុក​ប​វេ​ល​ ។​

​ក្រោយ​សមត្ថកិច្ច​ធ្វើការ​ឃាត់ខ្លួន​ ជនសង្ស័យ​ទាំង​០២​នាក់​ បាន​សា​ភាព​ថា​ ពួក​ខ្លួន​ពីរ​នាក់​ឪពុក​និង​កូន​ពិតជា​បាន​រាយ​ខ្សែ​រលួស​ដែល​មាន​ភ្ជាប់​ចរន្ត​អគ្គិស​នី​ដើម្បី​ឆក់​សត្វ​ (​សត្វ​កណ្ដុរ​)​ នៅ​ចំណុច​កើតហេតុ​ខាងលើ​ពិតប្រាកដ​មែន​ តែ​បែរជា​ត្រូវ​ជន​រង​គ្រោះ​ដើរ​ឆ្លងកាត់​បណ្តាល​ឲ្យ​ឆក់​ស្លាប់​ទៅ​វិញ ​។​

​បច្ចុប្បន្ន​ កម្លាំង​ជំនាញ​កំពុង​កសាង​សំណុំរឿង​ប​ញ្ជូ​ន​ទៅ​សាលាដំបូង​ខេត្ត​ ដើម្បី​អនុវត្ត​បន្ត​តាម​នី​តិ​វិធី​ ។​ ដោយឡែក​សាកសព​ជន​រង​គ្រោះ​ សមត្ថកិច្ច​បាន​ប្រគល់​ជូន​ក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី​ ៕

មតិយោបល់