ភ្នំពេញ:ស្ត្រីជាជនសង្ស័យ ជួញដូរគ្រឿងញៀន យ៉ាងសកម្មម្នាក់ ត្រូវបានម្លាំងនគរបាលប៉ុស្តិ៍មានជ័យ ធ្វើការឃាត់ខ្លួន និងដកហូតបានថ្នាំញៀន ចំនួន ២៨កញ្ចប់ (តូច ១៣កញ្ចប់ និងធំ ១៥កញ្ចប់) ពេលធ្វើសកម្មភាពជាក់ស្ដែង។

ការបង្ក្រាបនេះ ធ្វើឡើងកាលពីវេលាម៉ោង០៣ និង៣០នាទី រសៀលថ្ងៃទី២១ ខែមេសា ឆ្នាំ២០១៦ នៅចំណុចផ្លូវបេតុង (ច្រកចូលគំនរសំរាមចាស់) ភូមិដំណាក់ធំ ក្នុងសង្កាត់ស្ទឹងមានជ័យ ខណ្ឌមានជ័យ ក្រុងភ្នំពេញ។

លោក ឯម ភារី នាយរងប៉ុស្តិ៍នគរបាល ស្ទឹងមានជ័យ បានប្រាប់ឱ្យដឹងថា ស្ត្រីជនសង្ស័យ ដែលបានឃាត់ខ្លួន មានឈ្មោះ ឡាយ ស្រីលីន អាយុ ២៧ឆ្នាំ មានមុខរបរ មិនពិតប្រាកដ មានទីលំនៅក្នុង ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ។ មុនពេលកើតហេតុ លោកបានធ្វើការដឹកនាំកម្លាំងប៉ុស្តិ៍ ធើ្វការល្បាតនៅក្នុងភូមិសាស្ត្ររបស់លោក ក៏បានប្រទះឃើញស្ត្រីខាងលើ កំពុងអង្គុយនៅលើកៅអីជ័រ មុខតូបលក់អីវ៉ាន់ មួយកន្លែង។ ដោយមានការសង្ស័យ កម្លាំងរបស់លោក ក៏ហៅស្ត្រីរូបនោះមកធ្វើការសាកសួរ និងធ្វើការឆែកឆេរ ក៏ប្រទះឃើញមានលាក់ទុកថ្នាំញៀន ប្រភេទម្សៅក្រាមពណ៌សថ្លា ចំនួន ២៨កញ្ចប់ និងធ្វើការឃាត់ខ្លួន តែម្តង។

ក្រោយពេលកើតហេតុ កម្លាំងនគរបាលប៉ុស្តិ៍ ស្ទឹងមានជ័យ ក៏បាននាំខ្លួនស្ត្រីជាជនសង្ស័យ ជួញដូរគ្រឿងញៀន រូបនោះ ទៅធ្វើការឆែកឆេរ នៅផ្ទះស្នាក់នៅរបស់នាង តែមិនរកឃើញអ្វី ដែលជាវត្ថុតាងផ្សេងទៀតឡើយ ទើបនាំខ្លួនទៅធ្វើកំណត់ហេតុនៅប៉ុស្តិ៍ ដើម្បីបញ្ជូនខ្លួន ទៅកាន់អធិការដ្ឋាននគរបាល ខណ្ឌមានជ័យ ចាត់ការទៅតាមផ្លូវច្បាប់ ជាបន្តទៀត៕