កណ្ដាល: នៅថ្ងៃអង្គារ ៤រោច ខែផល្គុន ឆ្នាំជូត ទោស័ក ពុទ្ធសករាជ ២៥៦៤ ត្រូវនិងថ្ងៃទី២ ខែមីនា ឆ្នាំ២០២១ វេលាម៉ោង ៨និង១៧នាទីយប់ មានករណីគ្រោះថ្នាក់ចរាចរណ៍រវាង រថយន្ត និង ម៉ូតូ បណ្ដាលឲ្យស្លាប់ប្រុស ០១នាក់ ត្រង់ចំណុចខាងមុខផ្ទះ Wing វេលុយ សុខ ស្រីនួន លើផ្លូវ២១A ស្ថិតនៅភូមិសិត្បូ សង្កាត់សិត្បូ ក្រុងតាខ្មៅ ខេត្តកណ្ដាល ។

សភាពនៃរឿងហេតុ៖ មុនពេលកើតហេតុមានរថយន្ត ១គ្រឿងម៉ាក NISSAN ពណ៌បៃតង ពាក់ស្លាកលេខ ចង្កូតស្ដាំ ព្រះសីហនុ 3-0471 អ្នកបើករថយន្តមិនទាន់ស្គាល់អត្តសញ្ញាណ (រត់គេចខ្លួន) រថយន្តកំពុងបែនចាក់ថ្មក្នុងទិសដៅពីលិចទៅកើត នៅចំណុចកើតហេតុខាងលើ ស្របពេលនោះក៏មានម៉ូតូ ១គ្រឿងម៉ាក HONDA DREAM ពណ៌ខ្មៅ ពាក់ស្លាកលេខ កណ្ដាល1Z- 5312 (មិនពាក់មួកសុវត្ថិភាព និងមានកញ្ចក់មើលក្រោយ) អ្នកបើកម៉ូតូឈ្មោះ សូត្រ ពិសី ភេទប្រុស អាយុ ៣៥ឆ្នាំ មានទីលំនៅភូមិលេខ៤ សង្កាត់ស្វាយរលំ ក្រុងតាខ្មៅ (ស្លាប់ភ្លាមៗនៅកន្លែងកើតហេតុ ត្រូវបានសាច់ញាតិយកទៅធ្វើបុណ្យតាមប្រពៃណី) ម៉ូតូបើកក្នុងទិសដៅពីជើងទៅត្បូង ក៏បណ្ដាលឲ្យបុករថយន្តដែលមានម៉ាកខាងលើ ចំកាងសុវត្ថិភាព ជំហៀងខាងឆ្វេង បណ្ដាលឲ្យស្លាប់តែម្ដង ។

មូលហេតុ៖ មកពីអ្នកបើករថយន្ត ឈប់បែនចាក់ថ្មលើផ្លូវងងឹត មិនដាក់សញ្ញាសម្គាល់ឲ្យយានដែលធ្វើដំណើរលើផ្លូវបានដឹង ចំណែកអ្នកបើកម៉ូតូបើកបរក្នុងល្បឿនលឿនខ្វះការប្រុងប្រយ័ត្ន ។

ក្រោយពេលកើតហេតុសមត្ថកិច្ច ចុះដល់ទីតាំងវាស់វែងយកវត្ថុតាងទៅរក្សាទុក បណ្ដោះអាសន្ន នៅអធិការដ្ឋាន ដើម្បីចាត់ការតាមនីតិវិធី៕