ភ្នំពេញៈ រថយន្ត ២គ្រឿងបើកបរខ្វះការប្រុងប្រយ័ត្នបណ្ដាលឲ្យបុកគ្នាត្រង់ចំណុចផ្លូវបែកជាបួនរងការខូចខាតទាំងសងខាង សំណាងល្អ ដែលមិនមានគ្រោះថ្នាក់ដល់អ្នកបើកបរទាំងសងខាងក៏ដូចជាអ្នកធ្វើដំណើរតាមដងផ្លូវឡើយ។

ហេតុការណ៍នេះ បានកើតឡើងនៅវេលាម៉ោង ១២ថ្ងៃត្រង់ថ្ងៃទី៩ ខែមីនា ឆ្នាំ២០២១ ដែលស្ថិតនៅតាមបណ្ដោយផ្លូវលេខ៤៧កែងនឹងផ្លូវ៨៤ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

តាមប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ រថយន្តម៉ាក កូរ៉ូឡា ពណ៌ស្ករ ពាក់ស្លាកលេខ ភ្នំពេញ 2H-4022 ជិះគ្នា ២នាក់ ទិសដៅពីជើងទៅត្បូងតាមបណ្តោយផ្លូវលេខ៤៧ លុះមកដល់ត្រង់ចំណុចកើតហេតុ ក៏មានរថយន្តម៉ាក ហាយឡែនឌ័រ ពណ៌ស ពាក់ស្លាកលេខ ភ្នំពេញ 2BH-2409 បើកបរដោយស្ត្រីម្នាក់ ទិសដៅពីកើតទៅលិចតាមបណ្ដោយផ្លូវលេខ ៨៤ បានបុកជាមួយនឹងរថយន្តកូរ៉ូឡាចំទ្វារខាងក្រោយ បណ្ដាលឲ្យរថយន្តកូរ៉ូឡាជ្រុលទៅមុខបុកចំកាងដែករថយន្តដឹកទំនិញធុនធំ ១គ្រឿងទៀត រងការខូចខាតចង្កៀងឆ្វេង នៃរថយន្តកូរ៉ូឡាយ៉ាងដំណំ ។

ចំណែករថយន្តធុនធំដឹកទំនិញមិនមានខូចខាតអ្វីនោះក៏សុំតែមួយរួចខ្លួនរួចបើកពីកន្លែងកើតហេតុទៅបាត់ បន្សល់ទុកនៅតែរថយន្តហាយឡែនឌ័រ និងកូឡានៅដោះស្រាយសម្របសម្រួលគ្នា។

ក្រោយពេលកើតហេតុសមត្ថកិច្ចមូលដ្ឋាន បានមកដល់និងធ្វើការទំនាក់ទំនងទៅជំនាញចរាចរខណ្ឌ ចុះមកដល់ទីតាំងកន្លែងកើតហេតុ បានឲ្យភាគីទាំងពីរធ្វើការចរចាគ្នា ដោយភាគីខាងរថយន្តហាយឡែនឌ័រ ព្រមចេញជាសំណងសងទៅខាងរថយន្តកូរ៉ូឡាចំនួន ១៥០ដុល្លារ បញ្ចប់រឿងនៅនឹងកន្លែងកើតហេតុ៕