កំពង់ស្ពឺ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ម៉ូតូ២គ្រឿងបានប៉ះទង្គិចគ្នា បណ្តាលឲ្យរងរបួសធ្ងន់មនុស្ស៣នាក់ ដែលហេតុការណ៍នេះកើតឡើងនៅថ្ងៃសៅរ៍ ១៥រោច ខែផល្គុន ឆ្នាំជូត ទោស័ក ពុទ្ធស័ករាជ ២៥៦៤ ត្រូវនឹងថ្ងៃទី១៣ ខែមីនាឆ្នាំ ២០២១ វេលាម៉ោង០៦និង៤០នាទីព្រឹក លើកំណាត់ផ្លូវជាតិលេខ៤ ចន្លោះគីឡូម៉ែត្រលេខ 77-78 ត្រង់ចំណុចភូមិកុមារពេទ្យ ឃុំអូរ ស្រុកភ្នំស្រួច ខេត្តកំពង់ស្ពឺ ។
សមត្ថកិច្ចបានឲ្យដឹងថា ម៉ូតូទី១គ្រឿងម៉ាក វ៉ាន់ណេត ពណ៌ខ្មៅ គ្មានស្លាកលេខ បើកបរដោយឈ្មោះ សា ឡុង ភេទប្រុស អាយុ២២ឆ្នាំ មានទីលំនៅភូមិកុមារពេទ្យ ឃុំអូរ ស្រុកភ្នំស្រួច ខេត្តកំពង់ស្ពឺ ធ្វើដំណើរពីទិសខាងលិចទៅកើត ។ លុះ មកដល់ចំណុចខាងលើ បានប៉ះទង្គិចជាមួយម៉ូតូ១គ្រឿង ម៉ាក ZOOMER ពណ៌ស ពាក់ស្លាកលេខ បាត់ដំបង 1 AH- 5251 បើកចេញពីផ្លូវលំឆ្លងផ្លូវជាតិទៅទិសខាងលិច បើកបរដោយឈ្មោះ គង់ រស្មី ភេទប្រុស អាយុ២១ឆ្នាំ និងអ្នកជិះពីក្រោយឈ្មោះ ឯម ស្រីណេត ភេទស្រីអាយុ ១៧ ឆ្នាំនៅភូមិទឹកល្អក់ឃុំដំបូករូង ស្រុកភ្នំស្រួច ខេត្តកំពង់ស្ពឺ ។
ក្នុងហេតុការណ៍នេះ បណ្ដាលឲ្យអ្នកជិះម៉ូតូទាំងពីរភាគីរងរបួសមនុស្សធ្ងន់៣នាក់ ( ស្រី ១នាក់) ។
ក្រោយកើតហេតុ អ្នករងរបួសទាំង៣នាក់ត្រូវបានរថយន្ត ឯកជនដឹកយកទៅព្យាបាលនៅពេទ្យឯកជនភូមិតាឡាត់ថ្មី ។ ចំណែកម៉ូតូទាំង២គ្រឿង យកទៅរក្សាទុកនៅប៉ុស្តិ៍រដ្ឋបាលឃុំអូរ ដើម្បីដោះស្រាយតាមនីតិវិធី ៕
មតិយោបល់