ព័ត៌មានជាតិ

គួរឲ្យអាសូរណាស់! បុរស​ម្នាក់ ជិះម៉ូតូទៅខ្វារត្រីឆ្លូញនៅវាលត្រពាំងកក់ ត្រូវ​រន្ទះបាញ់​ស្លាប់នៅលើខ្នងទំនប់

​បន្ទាយ​មាន​ជ័យ:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរស​ម្នាក់​បាន​បាត់បង់​ជី​វិ​ភ្លាមៗ​នៅ​នឹង​កន្លែង​ដោយសារ​រន្ទះបាញ់​ ខណ:​កំពុង​ខ្វារ​ត្រី​ឆ្លូញ​នៅ​វាល​ត្រពាំង​កក់​ ខាងត្បូង​ភូមិពេលមេឃកំពុងភ្លៀង​ ។​

​ហេតុការណ៍​នេះ​ បាន​កើតឡើង​នៅ​វេលា​ម៉ោង​០៣​និង​៣០​នាទី​រសៀល​ ថ្ងៃ​ទី​១១​ ខែមេសា​ ឆ្នាំ​២០២១​ នៅ​ចំណុច​វាល​ត្រពាំង​កក់​ខាងត្បូង​ភូមិ​ម្កាក់​ ចម្ងាយ​ប្រហែល​៣​គីឡូម៉ែត្រ​ ស្ថិត​ក្នុងភូមិ​ម្កាក់​ សង្កាត់​ម្កាក់​ ក្រុង​សិរី​សោភ័ណ​ ខេត្តបន្ទាយមានជ័យ​ ។​

​នគ​របាល​មូលដ្ឋាន​បាន​ឲ្យ​ដឹង​ថា​ ជន​រង​គ្រោះ​ត្រូវ​បាន​គេ​ស្គាល់ឈ្មោះ​ ចក់​ ចាន់​ធី​ ភេទ​ប្រុស​ អាយុ​ ២៥​ឆ្នាំ​ នៅ​ភូមិ​២​ សង្កាត់​កំពុងស្វាយ​ ក្រុង​សិរី​សោភ័ណ​ ខេត្តបន្ទាយមានជ័យ​ ។​ មុន​ពេល​កើតហេតុ​ជន​រង​គ្រោះ​បាន​ជិះ​ម៉ូតូ​ទៅ​ខ្វារ​ត្រី​ឆ្លូញ​តែ​ម្នាក់ឯង​ នៅ​ចំណុច​វាល​ត្រពាំង​កក់​ខាងត្បូង​ ភូមិ​ម្កាក់​ ចម្ងាយ​ប្រហែល​៣​គីឡូម៉ែត្រ​ ស្ថិត​ក្នុងភូមិ​ម្កាក់​ សង្កាត់​ម្កាក់​ ។​

​ប្រភព​ដដែល​បាន​បញ្ជាក់​ថា​ មាន​ប្រជាពលរដ្ឋ​ម្នាក់​ធ្វើស្រែ​នៅ​ជិត​នោះ​និយាយ​ថា​ គាត់​ឮ​រន្ទះបាញ់​ប្រាវ​ ដោយ​មានការ​ភ័យ​ គាត់​បើក​ត្រាក់ទ័រ​ត្រឡប់​ពី​ភ្ជួរស្រែ​មក​ផ្ទះ​វិញ​ ។​ ពេល​បើក​មក​ដល់​ចំណុច​ខាងលើ​ បាន​ប្រទះ​ឃើញ​ជន​រង​គ្រោះ​ដេក​ស្លាប់​ លើ​ខ្នង​ទំនប់​ក្បែរ​ម៉ូតូ​ ដោយ​មាន​ដង​កង្ខារ​សម្រាប់​ខ្វារ​ត្រី​ឆ្លូញ​ធ្វើ​អំពី​ឫ​ស្សី​ប្រវែង​០២​ម៉ែត្រ​ គង​លើ​ដើមទ្រូង​ ហើយ​បាន​រាយការណ៍​មក​សមត្ថកិច្ច​ ។​

​ពេល​សមត្ថកិច្ច​ចុះ​ទៅ​ដល់​ពិនិត្យ​ឃើញ​ថា​ ជន​រង​គ្រោះ​គឺ​ស្លាប់​ដោយសារ​រន្ទះបាញ់​ ខណ:​ពេល​រៀប​ឡើង​ជិះ​ម៉ូតូ​ត្រឡប់​មក​ផ្ទះ​ ។​

​សព​ជន​រង​គ្រោះ​ក្រោយ​ពិនិត្យ​រួច​ បាន​ប្រគល់​ជូន​ក្រុម​គ្រួសារ​ យក​ទៅ​ចាត់ចែង​ធ្វើបុណ្យ​តាម​ប្រពៃណី​ ៕

មតិយោបល់