កណ្ដាល: យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃសុក្រ ៥កើត ខែពិសាខ ឆ្នាំឆ្លូវ ត្រីស័ក ព.ស ២៥៦៤ត្រូវនឹងថ្ងៃទី១៦ ខែមេសា ឆ្នាំ២០២១ កិច្ចប្រតិបត្តិការបង្ក្រាបករណីប្រើប្រាស់អាវុធខុសច្បាប់ និងជួញដូរដោយខុសច្បាប់ នូវសារធាតុញៀននៅចំណុចផ្ទះជនសង្ស័យឈ្មោះ ពែល មី នៅភូមិត្រពាំងកក់ ឃុំសំរោងលើ ស្រុកអង្គស្នួល ខេត្តកណ្តាល ។
ជនសង្ស័យ០៤នាក់ ឃាត់ខ្លួន០១នាក់៖ ១–ឈ្មោះ សាឡយ វិច្ឆិកា ហៅកា ភេទស្រី អាយុ១៦ឆ្នាំ ជនជាតិខ្មែរ មុខរបរ កសិករ ទីលំនៅ បច្ចុប្បន្ននៅភូមិត្រពាំងត្បែង ឃុំសំរោងលើ ស្រុកអង្គស្នួល ខេត្តកណ្តាល (ជួញដូរគ្រឿងញៀន) (ឃាត់ខ្លួន)។
២–ឈ្មោះ ពែល មី ភេទប្រុស អាយុ ២០ឆ្នាំ ជនជាតិខ្មែរ នៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (មេខ្លោង) (កាន់កាប់អាវុធម៉ាក Ak ស្វាយបត់ចំហៀង០១ដើម លេខ1744 ផលិតឆ្នាំ១៩៦៧ (បង់១ គ្រាប់២៧គ្រាប់) (គេចខ្លួន)។
៣–ឈ្មោះ ធីម ឌឿន (ហៅពែក) ភេទប្រុស អាយុ ២១ឆ្នាំ ជនជាតិខ្មែរ មានទីលំនៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (មេខ្លោង) កាន់កាប់អាវុធម៉ាក AK កាត់ស្វាយ០១ដើម (គ្មានស្វាយ) គ្មានលេខ បង់០១ គ្រាប់៣០គ្រាប់ និងអាវុធខ្លីម៉ាក ប្រាស់ហា ចំនួន០១ដើម លេខ Z518368 បង់ចំនួន០១ គ្រាប់០៦គ្រាប់ និង ស្រោមចំនួន០១ ។ ឈ្មោះ ធីម ឌឿន (ហៅពែក) មានដីកាបង្គាប់ឱ្យចាប់ខ្លួនចំនួន០៥ ពីបទជួញដូរដោយខុសច្បាប់នូវសារធាតុញៀន (គេចខ្លួន)។
៤–ឈ្មោះ សល់ រស្មី ភេទប្រុស អាយុ ២១ ឆ្នាំ ជនជាតិខ្មែរ មានទីលំនៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (គេចខ្លួន) ។
វត្ថុតាងដកហូត៖១/ អាវុធម៉ាក Ak ០១ដើម ស្វាយបត់ចំហៀង០១ដើម លេខ1744 ផលិតឆ្នាំ១៩៦៧(បង់១ គ្រាប់២៧គ្រាប់) និង
២/អាវុធម៉ាកAK កាត់ស្វាយ០១ដើម (គ្មានស្វាយ) គ្មានលេខ បង់០១ គ្រាប់៣០គ្រាប់ ។
៣/ អាវុធខ្លីម៉ាក ប្រាស់ហា ចំនួន០១ដើម លេខZ518368 បង់ចំនួន០១ គ្រាប់០៦គ្រាប់ និង ស្រោមចំនួន០១ ។
៤/ អាវុធច្នៃប្រើខ្យល់ បាញ់គ្រាប់កង់ចំនួន០៣ដើម
៥/ ដាវ០១ដើម ពូថៅដៃដងឈើ០១ កាំបិតប៉័ងតោ០១ និងកន្ត្រៃ០១។
៦/ថ្នាំញៀនម៉ាទឹកកក១កញ្ចប់ធំ ,ថ្នាំញៀន WY០២គ្រាប់ និងឧបករណ៍ប្រើប្រាស់វេចខ្ចប់ថ្នាំញៀនមួយចំនួន។
នៅមុនពេលកើតហេតុ កម្លាំងប៉ុស្តិ៍នគរបាលរដ្ឋបាលសំរោងលើ បានទទួលព័ត៌មានពីឈ្មោះ សឿន សារ៉ន ភេទស្រី អាយុ ៤០ឆ្នាំ ជនជាតិខ្មែរ នៅភូមិត្រពាំងកក់ ឃុំសំរោងលើ ស្រុកអង្គស្នួល ខេត្តកណ្តាល មុខរបរ កម្មកររោងចក្រ តាមទូរសព្ទរាយការណ៍ថា មានឈ្មោះ សល់ រស្មី (ត្រូវជាក្មួយបង្កើត) បានយកកាំភ្លើងកែច្នៃ (ប្រើខ្យល់ ដាក់ហ្គាសបាញ់គ្រាប់កង់) គំរាមបាញ់សម្លាប់សុំលុយ៥០០០៛ (ប្រាំពាន់រៀល) ។
ក្រោយពីទទួលបានព័ត៌មានបានភ្លាម កម្លាំងប៉ុស្តិ៍ សហការជាមួយកម្លាំងផ្នែកជំនាញស្រុក បានចុះទៅកន្លែងកើតហេតុ ដើម្បីពិនិត្យ និងស្រាវជ្រាវ តែមុនពេលទៅដល់ ជនសង្ស័យបានរត់គេចខ្លួនបាត់ បន្សល់ទុកអាវុធកែច្នៃ០១ដើមលាក់ទុកក្នុងផ្ទះ ។ បន្ទាប់មកកម្លាំងសមត្ថកិច្ច បានបន្តការស្រាវជ្រាវ និងតាមរកជនសង្ស័យ ហើយបានឃើញជនសង្ស័យទាំង៣នាក់ កំពុងពួនសំងំនៅផ្ទះឈ្មោះ ពែល មី ប៉ុន្តែជនសង្ស័យទាំង៣នាក់នោះ បានរត់គេចខ្លួនចូលព្រៃខាងកើតផ្ទះអស់បាត់ទៅ ។ ពេលនោះកម្លាំងសមត្ថកិច្ច បានប្រទះឃើញអាវុធ AKស្វាយបត់១ដើមលាក់ទុកក្នុងសំបុកមាន់ និងឧបករណ៍ប្រើប្រាស់ថ្នាំញៀនវេចខ្ចប់មួយចំនួន ។
ដោយមានបទបញ្ជា ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និងមានការសម្របសម្រួល ដោយឯកឧត្តម លាវ ស្រេង ព្រះរាជអាជ្ញានៃអយ្យការអមសាលាដំបូងខេត្តកណ្តាល មានការចូលរួមពី លោកនាយករដ្ឋបាលសាលាស្រុក លោកមេឃុំ លោកនាយប៉ុស្តិ៍រដ្ឋបាល លោកមេភូមិ និងនៅចំពោះមុខឈ្មោះ សាឡយ វិច្ឆិកា ភេទស្រី អាយុ១៦ឆ្នាំ ជនជាតិខ្មែរ នៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរមិនពិតប្រាកដ ជាប្រពន្ធរបស់ជនសង្ស័យឈ្មោះ ពែល មី អនុញ្ញាតឱ្យកម្លាំងសមត្ថកិច្ច ដឹកនាំដោយលោកវរសេនីយ៍ឯក មាន សំណាង អធិការនគរបាលស្រុក ធ្វើការឆែកឆេរផ្ទះជនសង្ស័យ រកឃើញអាវុធ AKស្វាយបត់១ដើមទៀត អាវុធខ្លី១ដើម ម៉ាកប្រាស់ហា និងដាវ០១ដើម និងពូថៅដៃដងឈើចំនួន០១ និងកាំបិតប៉័ងតោ០១ និងអាវុធច្នៃ០២ដើម (កាំភ្លើងខ្យល់) និងឃើញថ្នាំញៀនមួយកញ្ចប់ធំ ។
ចំពោះ សាឡយ វិច្ឆិកា ត្រូវបានអញ្ជើញមកកាន់អធិការដ្ឋាននគរបាលស្រុក ដើម្បីសួរនាំ តាមបញ្ជារបស់ឯកឧត្តមព្រះរាជអាជ្ញា។
តាមចម្លើយសារភាពរបស់ឈ្មោះ សាឡយ វិច្ឆិកា បានឆ្លើយថាខ្លួនជាអ្នកលក់ថ្នាំញៀន ចំណែកអាវុធខាងលើនេះត្រូវបានឈ្មោះ ពែល មី យកមកលាក់ទុកក្នុងផ្ទះខ្លួន នៅព្រឹកថ្ងៃទី១៦.០៤.២០២១ វេលាម៉ោងប្រហែល៥ព្រឹក។
បច្ចុប្បន្ន វត្ថុតាងត្រូវបាននាំយកមកកាន់ អធិការដ្ឋាននគរបាលស្រុក និងសាងសំណុំរឿងតាមនីតិវិធី ៕
មតិយោបល់