ព័ត៌មានជាតិ

ម៉ូតូរ៉ឺម៉ក១គ្រឿង ជិះគេចទឹកនៅលើដងផ្លូវ ជ្រុលទៅបុកសួនច្បារពុះចែកទ្រូងផ្លូវ បណ្តាលឲ្យមនុស្ស៥នាក់ ស្លាប់និងរងរបួសធ្ងន់

ភ្នំពេញ: បុរសម្នាក់បានស្លាប់ ខណ:ជិះពីក្រោយនៃរ៉ឺម៉កសណ្តោងមួយគ្រឿង ហើយត្រូវជនសង្ស័យឆ្លៀតឱកាស លូកស្ទាបច្របាច់យកកាបូបលុយ និងទូរស័ព្ទមួយគ្រឿង បន្ទាប់ពីជនរងគ្រោះផ្សេងទៀត រងរបួសហើយត្រូវបានគេបញ្ជូនទៅមន្ទីពេទ្យដើម្បីព្យាបាល ។

ហេតុការណ៍នេះ បានកើតឡើងកាលពី វេលាម៉ោង ៥និង៤០នាទីព្រឹកថ្ងៃទី២៤ ខែមេសា ឆ្នាំ២០២១ តាមបណ្តោយផ្លូវជាតិលេខ ៦ចំណុចមុខ រមណីយដ្ឋានដីមាស ក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ ។

បុរសដែលបាត់បង់ជីវិតនេះ មិនត្រូវបានស្គាល់អត្តសញ្ញាណនោះទេ ដោយធ្វើដំណើរជិះរ៉ឺម៉កមានគ្នា៥នាក់រួមទាំងតៃកុង ។

តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ រ៉ឺម៉កមួយគ្រឿងខាងលើទាំងតៃកុង និងអ្នករួមដំណើរសរុប៥នាក់ បានបើកតាមបណ្តោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុ មានទឹកលើផ្លូវនៅខាងស្តាំដៃ រួចក៏គេចមកឆ្វេងដៃរួចជ្រុលទៅបុកសួនច្បារ ពុះចែកទ្រូងផ្លូវក្រឡាប់រ៉ឺម៉ក បណ្តាលឱ្យបុរសម្នាក់ ដែលជិះខាងក្រោយគេស្លាប់ភ្លាមៗ នៅកន្លែង រីឯ៤នាក់ផ្សេងទៀតរងរបួសធ្ងន់ស្រាល ត្រូវបានគេដឹកទៅសង្គ្រោះនៅមន្ទីរពេទ្យ ។

ក្រោយពីកើតហេតុមួយសន្ទុះ មុនពេលសមត្ថកិច្ចមកដល់ ក៏ស្រាប់តែលេចជនសង្ស័យឆ្លៀតឱកាស មកលូកច្របាច់រាវរកកាបូបលុយ និងទូរស័ព្ទមួយគ្រឿង របស់សពយកគេចខ្លួនបាត់ស្រមោល ។

ក្រោយពេលកើតហេតុ សពត្រូវបានសមត្ថកិច្ច ទាក់ទងរថយន្តដឹកទៅតម្កល់ទុកនៅវត្តទឹកថ្លា ដើម្បីរង់ចាំសាច់ញាតិមកទទួល យកទៅធ្វើបុណ្យនៅពេលក្រោយ រីឯរ៉ឺម៉កត្រូវបានយកទៅរក្សាទុកបណ្តោះអាសន្ន នៅអធិការដ្ឋាននគរបាលខណ្ឌជ្រោយចង្វា ៕

មតិយោបល់