ភ្នំពេញ: ជនសង្ស័យ២ នាក់ត្រូវសមត្ថកិច្ចឃាត់ខ្លួនបាន បន្ទាប់ពីធ្វើសកម្មភាពឆក់កាបូបបានមួយថ្ងៃ កាលពីវេលាម៉ោង៧ និង ៣០នាទីយប់ ថ្ងៃទី២១ ខែមិថុនា ឆ្នាំ២០២១ ទីតាំងស្ថិតនៅទល់មុខផ្សារបឹងបៃតង តាមបណ្ដោយផ្លូវមហាវិថី ឈ្នះ ឈ្នះ ភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។

ជនសង្ស័យទី១-ឈ្មោះ អេង វ៉ាន់ដា ភេទប្រុស អាយុ២៨ឆ្នាំ មុខរបរកម្មករសំណង់ ស្នាក់នៅបន្ទប់ជួលភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។ ទី២-ឈ្មោះ រ៉េត ចាន់ណា ភេទប្រុស អាយុ២៦ឆ្នាំ មុខរបរលើកកាតុង ស្នាក់បន្ទប់ជួល ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ចំណែកជនរងគ្រោះឈ្មោះ ហាន់ សុដានី ភេទស្រី អាយុ៥១ឆ្នាំ មុខរបរលក់ដូរ មានទីលំនៅភូមិសាមគ្គី១ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។

សម្ភារៈបាត់បង់៖ លុយ៤៨០,០០០រៀល និងទូរស័ព្ទដៃម៉ាក Sam sung មួយគ្រឿង និងសម្ភារៈបន្សល់ទុកមាន ទូរស័ព្ទមួយគ្រឿង និងម៉ូតូនិច ពណ៌ស ឆ្នាំ២០២០ ពាក់ស្លាកលេខ ភ្នំពេញ 1IA-2793 ។

នៅមុនពេលកើតហេតុ កាលពីថ្ងៃទី២០ ខែមិថុនា ឆ្នាំ២០២១ នៅវេលាម៉ោង ៨ និង ០០ នាទី ត្រង់ចំណុចមុខផែស្ងួត តេង ឡាយ ផ្លូវមហាវិថី ឈ្នះ ឈ្នះ ស្ថិតក្នុងភូមិជង្រុក សង្កាត់ត្រពាំងក្រសាំង ដែលជនសង្ស័យខាងលើ បានធ្វើសកម្មភាព ឆក់កាបូបលុយពីជនរងគ្រោះ បានសម្រេចហើយ ជនរងគ្រោះបានមកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលត្រពាំងក្រសាំង ដោយបក្ខពួកជនសង្ស័យខាងលើ ជិះម៉ូតូម៉ាកនិច ពណ៌ស និងម៉ូតូម៉ាកសង់ប៊ិច សម្រាប់ធ្វើសកម្មភាព រហូតមកដល់ថ្ងៃទី២១ ខែមិថុនា ឆ្នាំ២០២១នេះ នៅវេលាម៉ោង៧ និង៣០នាទី នៅចំណុចមុខផ្សារបឹងបៃតង ភូមិជង្រុក សង្កាត់ត្រពាំងក្រសាំង ដោយកម្លាំងនគរបាលប៉ុស្តិ៍ត្រពាំងក្រសាំង កំពុងល្បាតតាមផ្លូវក្នុងមូលដ្ឋាន ក៏បានជួបជនសង្ស័យមានគ្នា២ នាក់ជិះម៉ូតូម៉ាកនិច ពណ៌ស ពាក់ស្លាកលេខភ្នំពេញ 1IA-27 93 ស៊េរីឆ្នាំ២០២០ នៅចំណុចខាងលើ ពេលនោះសមត្ថកិច្ចក៏បានឃាត់ជនសង្ស័យឲ្យឈប់ ប៉ុន្តែជនសង្ស័យមិនឈប់បែរជិះម៉ូតូរត់គេច បណ្ដាលឲ្យដួលនៅចំណុចផែស្ងួត តេង ឡាយ ភូមិចែងម៉ែង សង្កាត់សំរោងក្រោម ភ្លាមនោះសមត្ថកិច្ច ឃាត់ជនសង្ស័យបានម្នាក់ ហើយជនសង្ស័យម្នាក់ទៀត បានរត់ទៅលើកម៉ូតូរបស់ខ្លួន ដើម្បីជិះបន្តទៀតតែភ្លាមនោះ កម្លាំងនគរបាលបានដេញតាមបន្ត រហូតដល់ឃាត់ខ្លួនបានជនសង្ស័យទាំងពីរនាក់តែម្ដង នៅចំណុចផ្លូវជាតិលេខ៤ ភូមិជម្ពូវ័ន សង្កាត់ចោមចៅទី៣ យកមកសាកសួរតែម្តង ។

យោងតាមពាក្យបណ្ដឹង និងកំណត់ហេតុបណ្ដឹង របស់ជនរងគ្រោះ និងកំណត់ហេតុបំភ្លឺពិតជាមានករណី ដូចខាងលើពិតប្រាកដមែន ។

បច្ចុប្បន្ន ក្រោយពីការឃាត់ខ្លួនជនសង្ស័យ ទាំងពីរនាក់រួចហើយ កម្លាំងប៉ុស្តិ៍នគរបាលត្រពាំងក្រសាំង បានកសាងសំណុំរឿង បញ្ជូនទៅភ្នែកជំនាញ នៃអធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ការតាមនីតិវិធីបន្តទៀត ៕