បន្ទាយមានជ័យៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ស្ត្រីវ័យ៨៨ឆ្នាំម្នាក់ បានជួបគ្រោះថ្នាក់ចរាចរណ៍ដោយរថយន្តបុកពីក្រោយ បណ្តាលឲ្យស្លាប់នៅនឹងកន្លែង ។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង០៥និង០៥នាទីព្រឹក ថ្ងៃទី២៤ ខែមិថុនា ឆ្នាំ២០២១ នៅលើកំណាត់ផ្លូវជាតិលេខ៥៨ ចំណុចចន្លោះបង្គោលគីឡូម៉ែត្រលេខ៣៧៦-៣៧៧ ស្ថិតក្នុងភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ ។
ប្រភពពីនគរបាលស្រុកអូរជ្រៅ បានឲ្យដឹងថា លោកយាយរងគ្រោះ ឈ្មោះកុយ យ៉ង់ អាយុ៨៨ឆ្នាំ នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ។ មុនពេលកើតហេតុលោកយាយរងគ្រោះបានដើរលើទ្រូងផ្លូវជាតិលេខ៥៨ ក្នុងទិសដៅពីលិចទៅកើត ពេលដល់ចំណុចកើតហេតុចំណុចចន្លោះបង្គោលគីឡូម៉ែត្រលេខ៣៧៦-៣៧៧ ស្ថិតក្នុងភូមិសូរិយា ឃុំកូប មានរថយន្ត០១គ្រឿងដែលគេស្គាល់ម៉ាកតូយូតា ពណ៌ស មិនចាំស្លាកលេខ បានធ្វើដំណើរស្របទិសគ្នា បុកចំពីក្រោយ បណ្តាលជនរងគ្រោះស្លាប់ភ្លាមៗមួយរំពេចនៅនឹងកន្លែង ។
ប្រភពដដែលបានបញ្ជាក់ថា បើតាមការបំភ្លឺពីកូនថា លោកយាយរងគ្រោះគាត់មានវ័យចំណាស់ហើយមានស្មារតីវង្វេងពួកគាត់បាននាំគ្នាព្យាយាមដើររកដែរ ។ ចំពោះរថយន្តក្រោយពីបង្កគ្រោះថ្នាក់ចរាចរណ៍ បើករត់គេចខ្លួនបាត់ ពេលនេះសមត្ថកិច្ចកំពុងធ្វើការស្រាវជ្រាវ ។
ចំណែកសព ត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
មតិយោបល់