កំពង់ចាមៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថានៅថ្ងៃទី២៩ ខែមិថុនា ឆ្នាំ២០២១ វេលាម៉ោង១៨.៤៥នាទី បានទទួលពត៌មានពីប្រជាពលរដ្ឋ រាយការណ៍ថាមាន ករណីអគ្គីភ័យ ឆេះស្ថានីយ៍លក់ប្រេងឥន្ធនៈមួយកន្លែង នៅចំណុចភូមិពព្រេង ឃុំស្ពឺ ស្រុកចំការលើ ខេត្តកំពង់ចាម ក្រោយពីទទួលពត៌មាន លោកឧត្តមសេនីយ៍ស្នងការ បានបញ្ជាដឹកនាំកម្លាំងជំនាញ រថយន្តពន្លត់អគ្គិភ័យរបស់អធិការដ្ឋាន នគរបាលស្រុកចំការលើចំនួន ០១គ្រឿង រថយន្តពន្លត់អគ្គីភ័យការិយាល័យនគរបាលខេត្តចំនួន០៣គ្រឿង រថយន្តពន្លត់អគ្គិភ័យរបស់អធិការដ្ឋាននគរបាលស្រុកស្ទឹងត្រង់ចំនួន០២គ្រឿង រថយន្តពន្លត់អគ្គីភ័យរបស់អធិការដ្ឋាននគរបាលស្រុកកំពង់សៀមចំនួន០១គ្រឿង និងរថយន្តពន្លត់អគ្គីភ័យរបស់អធិការដ្ឋាននគរបាលស្រុកព្រៃឈរចំនួន០១គ្រឿង សរុបចំនួន ០៨គ្រឿង ចុះទៅអន្ដរាគមន៍ជួយពន្លត់ ។

មន្ត្រីនគរបាលស្រុកចំការលើ បានឲ្យដឹងថា ៖ ម្ចាស់ផ្ទះឈ្មោះ ជឹម រីន ភេទប្រុស អាយុ ៥៥ឆ្នាំ ជនជាតិជាតិខ្មែរ រស់នៅភូមិពព្រេង ឃុំស្ពឺ ស្រុកចំការលើ ខេត្តកំពង់ចាម ។

ប្រភពដដែលបានបន្តថា ៖ ហេតុការនេះ បណ្តាលអោយស្លាប់មនុស្ស ០១នាក់ឈ្មោះ អឿន រដ្ឋា ភេទស្រី អាយុ ៣០ឆ្នាំ ជាតិខ្មែរ (កូនម្ចាស់ផ្ទះ) (មូលហេតុបណ្តាលអោយស្លាប់ ដោយសារជនរងគ្រោះចូលយកទ្រព្យសម្បត្តិក្នុងផ្ទះ) ។

មន្ត្រីនគរបាលរូបនោះបានបញ្ជាក់បន្ថែមទៀតថា ការខូចខាតរួមាន ៖ ស្ថានីយ៏ប្រេង និងផ្ទះស្នាក់នៅសង់អំពីឈើប្រក់ក្បឿងជញ្ជាំងក្ដារ ទំហំ ៧ម៉ត្រ គុណ ៩ម៉ែត្រ (ឆេះអស់១០០%) រថយន្ត ម៉ាកលុចស៊ីស ៣៣០ ០១គ្រឿង ម៉ូតូ សេ១២៥ ០១គ្រឿង ប្រាក់ ចំនួនទៀត ។

រីឯមូលហេតុគឺ ៖ ឆ្លងចរន្តអគ្គីសនី(បាញ់ប្រេងបញ្ចូលកានបណ្តាលអោយផ្ទុះឆេះ) ។

ក្នុងកិច្ចប្រតិបត្តិការណ៍នេះ យើងប្រើប្រាស់រថយន្តពន្លត់អគ្គីភ័យ ០៨គ្រឿង ប្រើប្រាស់អស់ទឹក ០៩ រថយន្ត ។ អគ្គីភ័យរលត់អស់១០០% នៅវេលាមោង២០ និង៤០នាទី ៕