នគរបាលស្រុកថ្មពួកឃាត់ខ្លួន ជនដៃដល់កាប់ប្រហារប្រពន្ធក្រុមប្រឹក្សាឃុំថ្មពួក ដែលគេចខ្លួនបាន ៤ថ្ងៃ

បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ដោយ​អនុវត្ត​តាម​បទបញ្ជា​របស់​លោក​ឧត្តមសេនីយ៍ទោ​ សិទ្ធិ​ ឡោះ​ ស្នងការ​នគរបាល​ខេត្តបន្ទាយមានជ័យ​ កម្លាំង​នគរបាល​ជំនាញ​នៃ​អធិការដ្ឋាន​នគរបាល​ស្រុក​ថ្មពួក​ និង​កម្លាំង​នគរបាល​ប៉ុស្តិ៍​រដ្ឋបាល​ឃុំ​ថ្មពួក​ ធ្វើការ​ស្រាវជ្រាវ​និង​ឈាន​ដល់​ការ​ចាប់​ឃាត់ខ្លួន​ជន​ដៃដល់​ម្នាក់​ នៅ​វេលា​ម៉ោង​ ៤​និង​៣០​នាទី​ល្ងាច​ ថ្ងៃ​ទី​០៥​ ខែកក្កដា​ ឆ្នាំ​២០២១​ នៅ​ចំណុច​ផ្លូវ​ចូល​ទៅ​មណ្ឌល​ដីកា​រេ​ពីរ​ តំបន់​ភ្នំ​ចង្ក្រាន​យក្ស​ ក្នុងភូមិ​សាស្ត្រ​ឃុំ​បេង​ ស្រុក​បន្ទាយ​អំពិល​ ខេត្ត​ឧត្តមរ​មាន​ជ័យ​ រួម​ទាំង​ដកហូត​បាន​វត្ថុ​តាង​កាំបិត​ខ្វែវ​ ដែល​ធ្វើ​សកម្មភាព​កាប់​ទៅ​លើ​ស្ត្រី​រង​គ្រោះ​ រួច​បាន​យក​ទៅ​លាក់​ទុក​នៅ​ក្នុង​ចម្ការ​ដំឡូង​មី​ខាងកើត​វិទ្យាល័យ​ថ្មពួក​។​

​សូម​ជម្រាប​ថា​ នៅ​វេលា​ម៉ោង​៣​និង​៣៥​នាទី​រសៀល​ ថ្ងៃ​ទី​២​ ខែកក្កដា​ ឆ្នាំ​២០២១​ នៅ​ភូមិ​ថ្មពួក​ ឃុំ​ថ្មពួក​ ស្រុក​ថ្មពួក​ ខេត្តបន្ទាយមានជ័យ​ មាន​ករណី​ហឹ​ង្សា​ដោយ​ចេតនា​កើតឡើង​ បង្ក​ដោយ​ឈ្មោះ​ស្វឿ​ង​ ប៉ុង​ ជន​ដៃដល់​ ជា​មនុស្ស​ញៀន​ថ្នាំ​ បាន​ធ្វើ​សកម្មភាព​កាន់​កាំបិត​ខ្វែវ​ដើរ​តម្រង់​ចូល​មក​កាប់​អ្នក​ស្ត្រី​៣​ទៅ​៤​នាក់​ ដែល​កំពុង​ធ្វើ​ស្ល​ទឹក​នំ​បញ្ចុក​ហូប​ជា​លក្ខណ:​គ្រួសារ​ និង​ចិតបន្លែ​ដោយ​ពុំ​ដឹង​មូលហេតុ​។​ ដោយ​ឃើញ​ពី​សកម្មភាព​របស់​ជនល្មើស​ ស្ត្រី​ទាំងនោះ​បាន​នាំ​គ្នា​ស្ទុះ​ក្រោក​រត់​យករួចខ្លួន​ តែ​ចៃដន្យ​ស្ត្រី​ឈ្មោះ​ហឿ​ង​ សៃ​នាវ​ អាយុ​៥៨​ឆ្នាំ​ ជា​ប្រពន្ធ​របស់​ក្រុមប្រឹក្សា​ឃុំ​ថ្មពួក​ នៅ​ភូមិ​ថ្មពួក​ ឃុំ​ថ្មពួក​ ខេត្តបន្ទាយមានជ័យ​ បាន​ស្ទុះ​រត់​បាន​បន្តិច​ជាន់​ដុំ​ដី​ក្រឡាច់​ដួល​ ត្រូវ​ជន​ដៃដល់​កាប់​ត្រូវ​ចំ​ជើង​ទាំង​សងខាង​ ដៃ​ទាំង​សងខាង​ និង​ដងខ្លួន​ រង​របួសធ្ងន់​ ត្រូវ​បាន​ក្រុម​គ្រួសារ​បញ្ជូន​ទៅ​ព្យាបាល​នៅ​មន្ទីរពេទ្យ​បង្អែក​ស្រុក​ថ្មពួក​ តែ​ដោយ​របួស​ធ្ងន់ធ្ងរ​ ក្រុម​គ្រូពេទ្យ​ស្រុក​បាន​បញ្ជូន​បន្ត​ទៅ​មន្ទីរពេទ្យ​បង្អែក​ខេត្ត​ មិត្តភាព​កម្ពុជា​-​ជប៉ុន​ នៅ​ស្រុក​មង្គល​បូ​រី​ ចំណែក​ជន​ដៃដល់​ឈ្មោះ​ ស្វឿ​ង​ ប៉ុង​ បន្ទាប់​ពី​ធ្វើ​សកម្មភាព​រួច​បាន​រត់គេច​ខ្លួន​បាត់​។​

​បច្ចុប្បន្ន​ជនសង្ស័យ​កម្លាំង​នគរបាល​ជំនាញ​ព្រហ្មទណ្ឌ​នៃ​អធិការដ្ឋាន​នគរបាល​ស្រុក​ថ្មពួក​ កំពុង​រៀបចំ​សំណុំរឿង​បញ្ជូន​ខ្លួន​ទៅ​ស្នងការដ្ឋាន​នគរបាល​ខេត្តបន្ទាយមានជ័យ​ ដើម្បី​ចាត់ការ​បន្ត​តាម​នីតិវិធី​ច្បាប់​៕​

មតិយោបល់