តាកែវៈ នៅថ្ងៃពុធ ១១រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០៤ ខែសីហា ឆ្នាំ២០២១ វេលាម៉ោង១៨និង៣០នាទី ស្ថិតនៅលើផ្លូវជាតិលេខ៣ ចន្លោះគីឡូម៉ែត្រលេខ ៧៦-៧៧ ក្នុងភូមិព្រៃស្រោង ឃុំអង្គតាសោម ស្រុកត្រាំកក់ ខេត្តតាកែវ មានករណីគ្រោះថ្នាក់ចរាចរណ៍មួយកើតឡើង រវាងម៉ូតូនិងម៉ូតូ បើកបរក្នុងទិសដៅបញ្ច្រាសគ្នា បណ្តាលឲ្យរងរបួសចនួន០៣នាក់ ។

ករណីគ្រោះថ្នាក់ចរាចរណ៍ខាងលើនេះ មានម៉ូតូមួយគ្រឿង ម៉ាកហុងដាគុបជ្រុង C50 ពណ៌ទឹកប៊ិច គ្មានពាក់ផ្លាកលេខ បើកបរដោយ ឈ្មោះ ផុន ពុធ ភេទស្រី អាយុ៣២ឆ្នាំ មុខរបរកម្មការិនីរោងចក្រ នៅភូមិព្រៃរំដួល ឃុំត្រពាំងធំខាងត្បូង ស្រុកត្រាំកក់ ខេត្តតាកែវ (រងរបួសធ្ងន់) ដែលបើកមកពីទិសខាងត្បូង (បើកបរដោយមិនប្រកាន់ស្តាំគឺបញ្ច្រាសគេ) ។ លុះបើកបរមកដល់ចំណុច ខាងលើ បំរុងបត់ស្តាំឆ្លងផ្លូវទៅកើត ក៏ស្រាប់តែមានម៉ូតូ មួយគ្រឿងទៀត មកបុកចំពីចំហៀងខាងឆ្វេងតែម្តង ដែលម៉ូតូនោះម៉ាក ហុងដាឌ្រីម C125 ពណ៌ខ្មៅ ពាក់ផ្លាកលេខ ភ្នំពេញ 1CZ-0590 បើកបរដោយឈ្មោះ ម៉េង ចំរើន ភេទប្រុស អាយុ២៩ឆ្នាំ មុខរបរ កសិករ នៅភូមិ ព្រៃមោក ឃុំស្រែរនោង ស្រុកត្រាំកក់ ខេត្តតាកែវ (រងរបួសស្រាល) និងមានឌុបអ្នករួមដំណើរម្នាក់ ពីក្រោយឈ្មោះ អឿន ជូរី ភេទស្រី អាយុ២៨ឆ្នាំ មុខរបរកសិករ នៅភូមិ-ឃុំជាមួយគ្នា (រងរបួសស្រាល) ដែលបើកបរមក ពីទិសខាងជើង ។

ភាគីទាំងសងខាងពុំមាននរណាម្នាក់ ពាក់មួកសុវត្ថិភាព នោះទេ ។ ហើយអ្នករបួសទាំងអស់ ត្រូវបានសាច់ញាតិ ដឹកបញ្ជូន យកទៅសង្គ្រោះនៅមន្ទីរពេទ្យបាត់អស់ទៅ ។ មូលហេតុ៖ បណ្តាលមកពីការបើកបរមិនប្រកាន់ស្តាំ ។

ក្រោយពេលកើតហេតុ កម្លាំងសមត្ថកិច្ចជំនាញនៅក្នុងមូលដ្ឋាន បានកសាងសំណុំរឿង ចាត់ការបន្តតាមនីតិវិធី ។ រីឯវត្ថុតាងម៉ូតូទាំងពីរគ្រឿងខាងលើ ត្រូវបានយកមករក្សាទុក ជាបណ្តោះអាសន្ន នៅអធិការដ្ឋាននគរបាលស្រុកត្រាំកក់ ៕