សៀមរាបៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា បុរសម្នាក់ត្រូវបានសមត្ថកិច្ចនគរបាលព្រហ្មទណ្ឌ នៃស្នងការដ្ឋាននគរបាលខេត្តសៀមរាប ស្រាវជ្រាវឃាត់ខ្លួន ពាក់ព័ន្ធករណីលួចមានស្ថានទម្ងន់ទោស (គាស់ទម្លុះទម្លាយយកទ្រព្យសម្បត្តិ ) និងប្រើប្រាស់ដោយខុសច្បាប់នូវសារធាតុញៀន ។
ជនសង្ស័យឈ្មោះ លឹម សាវុធ ហៅ វុធ ភេទប្រុស អាយុ៤២ឆ្នាំ មានស្រុកកំណើតនៅឃុំប្រសូត្រ ស្រុកស្វាយទៀប ខេត្តស្វាយរៀង បច្ចុប្បន្នរស់នៅមិនពិតប្រាកដ ត្រូវសមត្ថកិច្ចឃាត់ខ្លួននៅថ្ងៃទី០៦ ខែសីហា ឆ្នាំ២០២១ ។
លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌបានឲ្យដឹងថា : នៅថ្ងៃទី០៥ ខែ សីហា ឆ្នាំ ២០២១ វេលាម៉ោង១៤និង០០នាទី នៅភូមិ ខ្នារ សង្កាត់ជ្រាវ ក្រុង.ខេត្តសៀមរាប ជនសង្ស័យឈ្មោះ លឹម សាវុធ បានធ្វើសកម្មភាពកាត់ផ្តាច់សោររបង និងគាស់ទ្វារផ្ទះរបស់ជនរងគ្រោះឈ្មោះ ស៊ត ណារី ភេទស្រី អាយុ៣១ឆ្នាំ រស់នៅភូមិកើតហេតុខាងលើ ខណៈ ជនរងគ្រោះមិនបាននៅផ្ទះ ហើយចូលលួចយកនាឡិកាដៃចំនួន០១គ្រឿង ស្រាចំនួន ០១ដប (ស្រាបារាំង) និង ឧបករណ៍បំពងសម្លេង(speaker) ចំនួន០១គ្រឿង ។
ក្រោយពីធ្វើសកម្មភាពលួចបានហើយ ជនសង្ស័យបានចេញពីផ្ទះជនរងគ្រោះ បំរុងជិះម៉ូតូគេចខ្លួន ត្រូវប្រជាពលរដ្ឋដែលនៅក្បែរនោះឃើញ ក៏ស្រែកឆោឡោ នឹងរាយការណ៍ដល់សមត្ថកិច្ច ចុះធ្វើការអន្តរាគមន៍ភ្លាមៗ និងធ្វើការឃាត់ខ្លួនជនសង្ស័យយកមកសួរនាំ ។
ករណីនេះ សមត្ថកិច្ចជំនាញបានកសាងសំណុំរឿងបញ្ជូនទៅសាលាដំបូងខេត្ត ដើម្បីអនុវត្តតាមនីតិវិធី ៕
មតិយោបល់