កណ្ដាលៈ យោងតាមផេកអគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី២០ ខែមករា ឆ្នាំ២០១៩ វេលាម៉ោង៣និង៣០នាទីទៀបភ្លឺ នៅចំណុច ក្នុងបរិវេណ ផ្ទះឪពុកជនរងគ្រោះ ហ៊ី សុងហេង ក្នុងភូមិកព្រែកសំរោង ឃុំកោះធំ(ខ) ស្រុកកោះធំ ខេត្តកណ្តាល មានករណីលួចរថយន្តមួយគ្រឿង ម៉ាកហាយឡេនឌ័រ ។
ជនរងគ្រោះឈ្មោះ ហ៊ី ឆវី ភេទស្រី អាយុ៣៩ឆ្នាំ ជនជាតិខ្មែរមានទីលំនៅសព្វថ្ងៃផ្ទះលេខ 39 C ភូមិតាង៉ូវ សង្កាត់ព្រែកប្រា ខណ្ឌមានជ័យ រាជធានីភ្នំពេញ មុខរបររកស៊ី ចងការប្រាក់។
ជនសង្ស័យ មិនស្គាល់អត្តសញ្ញាណ (គេចខ្លួនបាត់)។
សម្ភារបាត់បង់រួមមាន ៖ ១-រថយន្ត១គ្រឿងម៉ាក ហាយឡែនឌ័រ ពណ៌ស ពាក់ស្លាកលេខភ្នំពេញ 2AK- 2876, ២-អត្តសញ្ញាណប័ណ្ណសញ្ជាតិខ្មែរ ១ សន្លឹក, ៣-ប័ណ្ណបើកបររថយន្ត១សន្លឹក, ៤-កាបូបលុយ០១។
កាលពីថ្ងៃទី១៧ ខែមករា ឆ្នាំ២០១៩ ជនរងគ្រោះបានមកលេងផ្ទះឪពុកម្តាយនៅឯស្រុកកំណើតភូមិព្រែកសំរោង ឃុំកោះធំក(ខ) ស្រុកកោះធំ ខេត្តកណ្ដាល ដើម្បីចូលរួមកម្មវិធីបុណ្យរបស់បងប្អូន។
ដោយនៅពេលយប់ឡើងជនរងគ្រោះ តែងតែយករថយន្តរបស់ខ្លួនខាងលើមកទុកនៅ ក្រោមសំយាបផ្ទះខាងមុខផ្ទះ ដែលមានរបងព័ទ្ធជុំវិញត្រឹមត្រូវ ទោះពេលថ្ងៃឡើង ជនរងគ្រោះតែងតែយកឡានជិះកម្សាន្តជាមួយគ្រួសារ។
លុះរហូតមកដល់យប់ថ្ងៃទី២០ ខែមករា ឆ្នាំ២០១៩ ជនរងគ្រោះ ក៏បានយករថយន្តរបស់ខ្លួនខាងលើ មកទុកនៅផ្ទះឪពុករបស់ខ្លួនដូចសព្វដង ហើយជនរងគ្រោះព្រមជាមួយគ្រួសារឪពុកម្ដាយ ក៏បាននាំគ្នាចូលសម្រាកបាត់ទៅ។ លុះរហូតមកដល់ ពេលកើតហេតុខាងលើ ជនរងគ្រោះ ភ្ញាក់ពីដំណេក ក៏បើកទ្វារចេញមកមើលរថយន្ត ស្រាប់តែបាត់ពុំឃើញតែម្តង ។
ក្រោយមកជនរងគ្រោះព្រមជាមួយគ្រួសារ បានរាយការណ៍ជូនសមត្ថកិច្ចនគរបាល។ បន្ទាប់ពីទទួលបានព័ត៌មាននេះ ភ្លាមកម្លាំងនគរបាលប៉ុស្តិ៍កោះធំ(ខ) និងកម្លាំងជំនាញយុត្តិធម៌ស្រុក បានចុះដល់កន្លែងកើតហេតុធ្វើការសាកសួរនិងស្រាវជ្រាវ។
បច្ចុប្បន្នកម្លាំងនគរបាលស្រុក និងប៉ុស្តិ៍កំពុងតែធ្វើការស៊ើបអង្កេតវជ្រាវដើម្បីកំណត់រកមុខសញ្ញា ៕
មតិយោបល់