បង្ក្រាប​ករណី​ដឹក​ជញ្ជូន​គ្រឿងញៀន​ឆ្លង​ដែន​ តាម​កញ្ចប់​បញ្ញើ​ ឃាត់ខ្លួនជនសង្ស័យចំនួន០៤នាក់

​ភ្នំពេញ:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ដោយ​អនុវត្ត​តាម​បញ្ជា​ឯកឧត្តម​ នាយ​ឧត្ដម​សេនិយ៍​ សន្តិ​បណ្ឌិត​ នេ​ត​ សា​វឿ​ន​ អគ្គស្នងការ​នគរបាល​ជាតិ​ និង​ឯកឧត្តម​ នាយ​ឧត្ដម​សេនិយ៍​ ម៉ក់​ ជី​តូ​ អគ្គស្នងការ​រង​ទទួល​ផែន​ប្រឆាំង​បទល្មើស​គ្រឿងញៀន​ ក្រោម​ការ​បញ្ជា​ដឹកនាំ​ផ្ទាល់​ របស់​ឯកឧត្តម​ឧត្ដមសេនីយ៍ឯក​ ឡឹ​ក​ វណ្ណ:​ នាយក​មន្ទីរ​ប្រឆាំង​បទល្មើស​គ្រឿងញៀន​ ។​

​ជាក់ស្តែង​កាលពី​ថ្ងៃ​ទី​១៩​ ខែសីហា​ ឆ្នាំ​២០២១​ វេលា​ម៉ោង​១៤​និង​៣០​នាទី​ កម្លាំង​ជំនាញ​នៃ​មន្ទីរ​ប្រឆាំង​គ្រឿងញៀន ​(​ក​១០)​ ដឹកនាំ​ដោយ​លោក​ឧត្តមសេនីយ៍ទោ​ សារី​ បុត្រ​សត្យា​ និង​លោក​វរសេនីយ៍ឯក​ យឹ​ម​ សែន​ឧត្តម​ នាយករង​មន្ទីរ​ បាន​សហការ​ជាមួយ​គយ​ និង​រដ្ឋាករ​ប្រចាំ​ឃ្លាំងទំនិញ ​(CARGO)​ នៃ​អាកាសយានដ្ឋាន​អន្តរជាតិ​ភ្នំពេញ​ ព្រមទាំង​មានការ​សម្របសម្រួល​ពី​លោក​ សេង​ ហៀ​ង​ ព្រះរាជអាជ្ញា​រង​នៃ​អយ្យការ​អម​សាលាដំបូង​រាជធានី​ភ្នំពេញ​ បាន​ធ្វើការ​ត្រួតពិនិត្យ​កញ្ចប់​បញ្ញើ​មិន​ប្រក្រតី​ ដែល​ផ្ញើ​ពី​ទីក្រុង​ JOHANNESBURG​ ប្រទេស​អាហ្វ្រិក​ខាងត្បូង​ ចូល​មក​កម្ពុជា​ តាម​រយ​:​ក្រុមហ៊ុន​ DHL​ ដែល​បង្កប់​លាក់​សារធាតុ​ញៀន​ (​រាវ​) ​ប្រភេទ​ កេ​តា​មីន ​(​ KETAMINE​ )​ ក្នុង​ដប​ជ័រ​ពណ៌​ស​ ម៉ាក​ ALOE​ GEL​ ចំនួន​៦០​ដប​ មាន​ទម្ងន់​ ១០​គីឡូក្រាម​(​គិត​ទាំង​សម្បក​)​ ។​

​ដោយឡែក​ នៅ​ថ្ងៃ​ទី​២៥​ ខែសីហា​ ឆ្នាំ​២០២១​ កម្លាំង​ជំនាញ​មន្ទីរ​ប្រឆាំង​បទល្មើស​គ្រឿងញៀន​ បាន​បន្ត​ការ​ស៊ើបអង្កេត​ ដោយ​អនុវត្ត​តាម​នីតិវិធី​ប្រគល់​ដោយ​មានការ​ឃ្លាំមើល​ សហការ​ជាមួយ​កម្លាំង​ នៃ​ស្នងការដ្ឋាន​នគរបាល​ខេត្តបន្ទាយមានជ័យ​ និង​មានការ​សម្របសម្រួល​ពី​លោក​ លឹ​ម​ ប៊ុ​ន​សុ​ភក្តិ​ ព្រះរាជអាជ្ញា​រង​ នៃ​អយ្យការ​អម​សាលាដំបូង​ខេត្តបន្ទាយមានជ័យ​ ឈាន​ទៅ​បង្ក្រាប​នៅ​ចំណុច​មុខ​ផ្ទះ​គ្មាន​លេខ​ ផ្លូវ​បេតុង​ភូមិ​ ប៉ោយ​ប៉ែ​ត​ សង្កាត់​ប៉ោយ​ប៉ែ​ត​ ក្រុង​ប៉ោយ​ប៉ែ​ត​ ខេត្តបន្ទាយមានជ័យ​ ។​

​ក្នុង​ប្រតិបត្តិការ​ខាងលើ​ សមត្ថកិច្ច​បាន​ឃាត់ខ្លួន​ជនសង្ស័យ​៤​នាក់​ ៖ ១-​ឈ្មោះ​ ZHANG​ ZHI​ QIANG​ ភេទ​ប្រុស​ អាយុ​៣២​ឆ្នាំ​ ជនជាតិ​ចិន​ លិខិតឆ្លងដែន​ E89753382​ ។ ២-​ឈ្មោះ​ ឆូ​យ​ ប៊ុ​ន​វុ​ទ្ធ​ ភេទ​ប្រុស​ អាយុ​៦៥​ឆ្នាំ​ ជនជាតិ​ខ្មែរ​ ។​ ៣-​ឈ្មោះ​ FU​ XIN​ MING​ ភេទ​ប្រុស​ អាយុ​៤៧​ឆ្នាំ​ ជនជាតិ​ចិន​ លិខិតឆ្លងដែន​ EE2807074​។ ៤-​ឈ្មោះ​ HU​ XIAO​ HUI​ ភេទ​ស្រី​ អាយុ​ ២៣​ឆ្នាំ​ ជនជាតិ​ចិន​ លិខិតឆ្លងដែន​ EE7058599 ។

​ចាប់​យក​វត្ថុ​តាង​ ៖​ -​សារធាតុ​ញៀន​ កេ​តា​មីន ​(KETAMIE)៦០​ដប​ ទម្ងន់​សុទ្ធ​ ៥​ គ​.​ក្រ​ ១៣៤.២០​ក្រាម​(៥១៣៤,២០​ក្រាម​)​ ។​

​ជនសង្ស័យ​ និង​វត្ថុ​តាង​ សមត្ថកិច្ច​ជំនាញ​បាន​កសាង​សំណុំរឿង ​បញ្ជូន​ទៅ​សាលាដំបូង​រាជធានី​ភ្នំពេញ​ តាម​ចាត់ការ​បន្ត​នីតិវិធី​ ៕

មតិយោបល់