ភ្នំពេញ: កម្លាំងនគរបាលខណ្ឌទួលគោក ដាក់គោលដៅអនុវត្តច្បាប់ ចរាចរណ៍ផ្លូវគោក ជិតបញ្ចប់ទៅហើយ ស្រាប់តែមានក្មេងស្ទាវម្នាក់ ជិះម៉ូតូមួយគ្រឿងមកបុកទាំងកម្រោល បណ្ដាលឲ្យមន្ត្រីនគរបាលម្នាក់ រងរបួសធ្ងន់ និងក្មេងស្ទាវរងរបួសស្រាល កាលវេលាម៉ោង០៩និង១០នាទីយប់ ថ្ងៃច័ន្ទ ទី២៧ ខែកញ្ញា ឆ្នាំ២០២១
ស្ថិតតាមបណ្ដោយផ្លូវ២៧១ ចំណុចមុខផ្សារហេងលី ក្នុងសង្កាត់ទឹកល្អក់៣ ខណ្ឌទួលគោក ។

ជនរងគ្រោះមានឈ្មោះ រតនា មុខរបរនគរបាលចរាចរណ៍ ខណ្ឌទួលគោល រងរបួសធ្ងន់

យោងតាមប្រភពពីមន្ត្រីនគរបាលម្នាក់ បានប្រាប់អង្គភាពសារព័ត៌មាន Post News TV បានឲ្យដឹងថា កម្លាំងនគរបាល ខណ្ឌទួលគោក កំពុងអនុវត្តច្បាប់ចរាចរណ៍ផ្លូវគោក នៅតាមបណ្ដោយផ្លូវ២៧១ ចាប់ពីម៉ោង0៨និង០០នាទីយប់ រហូតដល់ម៉ោងកើតហេតុខាងលើ ជិតបញ្ចប់ទៅហើយ ខណ:ពេលនោះស្រាប់តែមានក្មេងស្ទាវម្នាក់ ជិះម៉ូតូស៊ុយគីឡែត ពណ៌ទឹកប្រាក់ ពាក់ស្លាក HM 9792 ធ្វើដំណើរទិសដៅពីត្បូងទៅជើង មិនមានមួកការពាសុវត្ថិភាពនោះទេ បានជិះចូលកាត់បារ៉ាស់ក្នុងល្បឿនដូចហោះ សង្ស័យស្រវឹងជ្រុលទៅបុកមន្ត្រីនគរបាលម្នាក់ បណ្ដាលឲ្យរងរបួសធ្ងន់សន្លប់ស្តូក ចំណែកជនបង្ករងរបួសបែកមុខមាត់ស្រាល ភ្លាមៗនោះដែរមន្ត្រីនគរបាល ដែលរងរបូសធ្ងន់ ត្រូវសមត្ថកិច្ចដាក់កង់បី ទៅសង្គ្រោះជីវិតភ្លាមៗ ចំណែកក្មេងស្ទាវដែលជាជនបង្ក ត្រូវដាក់រថយន្តសាម៉ុយទៅព្យាបាល ។

ក្រោយកើតហេតុ ម៉ូតូជនបង្កត្រូវសមត្ថកិច្ចយកទៅរក្សាទុក នៅអធិការដ្ឋានខណ្ឌទួលគោក រង់ចាំដោះស្រាយគ្នាតាមផ្លូវច្បាប់ ៕