-

នគរបាលឃាត់ខ្លួនជនសង្ស័យម្នាក់ ករណីកាន់ដាវគំរាមកំហែងថា នឹងសម្លាប់

កណ្ដាល: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា នគរបាលស្រុក កណ្ដាលស្ទឹង ធ្វើការឃាត់ខ្លួនជនសង្ស័យ​ម្នាក់​ចាត់ការតាមច្បាប់ បន្ទាប់ពីជនសង្ស័យរូបនេះ ពុំដឹងជាមានរឿងហេតុអ្វី បានកាន់ដាវរួចគំរាមកំហែងថានឹងសម្លាប់ទៅបុរសជាម្ចាស់សំណាក់ម្នាក់ ដែលកំពុងផឹកតែនៅក្នុងផ្ទះ ។ ករណីនេះ​បានកើតឡើង កាលពីថ្ងៃទី៣០ ខែកញ្ញា ឆ្នាំ២០២១​ វេលា​ម៉ោង​០៩និង៣០នាទី​ ចំណុចភូមិ​សៀមរាប​ ឃុំ​សៀមរាប​ ស្រុកកណ្ដាលស្ទឹង ខេត្តកណ្ដាល ។

មន្ត្រីនគរបាលស្រុកកណ្ដាលស្ទឹងបានឲ្យដឹងថា៖ ជនរងគ្រោះឈ្មោះ​ ណិប​ កេសា ភេទ​ ប្រុស​ អាយុ​ ៤៩ឆ្នាំ​ មាន​ទីលំនៅ​ភូមិ​សៀមរាប​ ឃុំ​សៀមរាប​ ស្រុកកណ្តាល​ស្ទឹង​ ខេត្ត​កណ្ដាល​។ មុខ​របរ​ កសិករ​។ ចំណែកជនសង្ស័យ​ឈ្មោះ​ យ៉េន​ ចាន់​ដារ៉ា​ ភេទប្រុស អាយុ ​២៨​ឆ្នាំ​ មានទីលំនៅ​ភូមិ​សៀមរាប​ ​ឃុំ​សៀមរាប​ ស្រុកកណ្ដាលស្ទឹង ខេត្តកណ្ដាល ​។​ មុខរបរ ​ មិន​ពិត​ប្រាកដ​( ឃាត់​ខ្លួន​)។

វត្ថុ​តាងចាប់​យករួមមាន៖ ដាវ​ផ្លែដែក​ដង​ឬស្សី​​ប្រវែង​ ៧៧សង់ទីម៉ែត្រ។

​ប្រភព​ដដែលបន្តថា៖ នៅថ្ងៃ/ខែ​/ឆ្នាំ​កើតហេតុ​ជនរងគ្រោះ​កំពុង​អង្គុយ​ផឹក​តែ​នៅមុខផ្ទះ​សំណាក់​របស់​ខ្លួន​យីហោ​ កេសា​ តែម្នាក់ឯង​ ស្រាប់តែ​ជនសង្ស័យ​បានដើរមកពីទិសខាងលិច​ដោយ​កាន់ដាវខាងលើ មកដល់​ចំណុច​​កើតហេតុ​ឃើញ​ជនរងគ្រោះ​កំពុង​អង្គុយ​ម្នាក់​ឯងក៏ឈប់​ហើយស្រែគំរាមថា”អាញ់​និង​សម្លាប់​ហ្អែង​”ដោយពុំដឹងមូលហេតុ បន្ទាប់មកជនសង្ស័យ​បាន​រត់​ចូល​ រួច​យាដៃបម្រុងកាប់​ជនរងគ្រោះ​ ឃើញ​ដូច​នោះ​ជនរងគ្រោះ​បាន​រត់​ចូល​ទៅ​ក្នុង​ផ្ទះ​ហើយ​បិតទ្វា​រ ដាក់​គន្លឹះ​ជាប់​ ពេល​នោះ​ជនសង្ស័យ​បាន​ស្រែក​នៅមុខផ្ទះ​ថា​ “អញនិង​សម្លាប់​ហ្អែង​ចោល”​ភ្លាម​នោះ​ជនរងគ្រោះ​បាន​ តេទូរស័ព្ទ​រាយការណ៍​ជូន​សមត្ថកិច្ច​ប៉ុស្តិ៍​នគរបាល​រដ្ឋ​បាល​ឃុំ​ សៀមរាប​តែម្ដង ។

ក្រោយ​ពី​បាន​ទទួល​ពត៌មាន​ភ្លាម​កម្លាំង​ប៉ុស្តិ៍​នគរបាល​រដ្ឋ​បាល​ឃុំ​សៀមរាប​ បាន​ចុះទៅ​ដល់​កន្លែង​កើត​ហេតុ​ឃាត់ខ្លួន​ជនសង្ស័យ​ និង​វត្ថុ​តាងបញ្ជូន​មកកាន់អធិការ​ដ្ឋាន​ដើម្បី​សាកសួរ​និង​កសាង​សំនុំរឿងតាម​នីតិវិធី​ច្បាប់ ៕

មតិយោបល់