ព័ត៌មានជាតិ

បុរស​ម្នាក់​ស្រវឹងស្រា​ទៅ​មើល​មង​ រអិល​ជើង​ធ្លាក់​ទឹក​ប្រឡាយ​បណ្ដាលឲ្យ​លង់​ស្លាប់​

បាត់ដំបង: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា នៅ​ថ្ងៃ​ទី​០៨​ ខែតុលា​ ឆ្នាំ​២០២១​ វេលា​ម៉ោង​២០​និង​៣០​នាទី​ ត្រង់​ចំណុច​លូ​តា​ផ​ន​ដៃ​អូរ​ត្រស់​ ក្រុម​ទី​១២​ ភូមិ​ត្រស់​ ឃុំ​អូរ​តា​គី​ ស្រុក​ថ្មគោល​ ខេត្តបាត់ដំបង​ មាន​ករណី​មនុស្ស​លង់ទឹក​ប្រឡាយ​ស្លាប់​បាត់បង់​ជីវិត​ ។​

ជន​រង​គ្រោះ​ឈ្មោះ​ ម៉ក់​ តែម​ ភេទ​ប្រុស​ អាយុ​៧១​ឆ្នាំ​ មុខរបរ​ ធ្វើស្រែ​ រស់នៅ​ភូមិ​ត្រស់​ ឃុំ​អូរ​តា​គី​ ស្រុក​ថ្មគោល​ ខេត្តបាត់ដំបង​ ។​

​តាម​ការ​បំភ្លឺ​ពី​ឈ្មោះ​ ទឹម​ ហុច​ ភេទ​ស្រី​ អាយុ​៧៦​ឆ្នាំ​ ត្រូវជា​ប្រពន្ធ​ បានឲ្យ​ដឹង​ថា​នៅ​ថ្ងៃ​កើតហេតុ​ វេលា​ម៉ោង​១១​និង​០០​នាទី​ ប្ដី​របស់​ខ្លួន​បាន​ផឹកស្រា​ស្រវឹង​រហូត​ដល់​ម៉ោង​១៧​និង​៣០​នាទី​ ប្ដី​របស់​ខ្លួន​បាន​ដើរទៅ​មើល​មង​ដាក់​ត្រី​នៅ​ចំណុច​ប្រឡាយ​ដៃ​អូរ​ត្រស់​ ដោយ​បាត់​ប្ដី​យូរ​ពេក​ខ្លួន​ក៏​ទៅ​តាម​រក​ មក​ដល់​កន្លែង​ប្ដី​របស់​ខ្លួន​ដាក់​មង​តែ​រក​មិនឃើញ​ប្ដី​ ឃើញ​តែ​ស្បែកជើង​អណ្ដែត​ទឹក​នៅ​ជាប់មាត់​លូ​ ខ្លួន​ក៏​មានការ​សង្ស័យ​ក៏​បាន​ដើរ​រក​ក៏​ប្រទះ​ឃើញ​សាកសព​ប្ដី​របស់​ខ្លួន​លង់ទឹក​ស្លាប់​ រួច​ក៏​នាំ​កូន​ស្រង់​យក​មក​ដាក់​នៅ​វត្ត​ត្រស់​ ហើយ​រាយការណ៍​ជូន​សមត្ថកិច្ច​តែ​ម្ដង​ ។​

​ក្រោយ​ពី​ពិនិត្យ​ទីកន្លែង​កើតហេតុ​និង​សាកសព​ព្រមទាំង​សាកសួរ​បំភ្លឺ​សាក្សី​ជុំវិញ​កន្លែង​កើតហេតុ​ សមត្ថកិច្ច​ជំនាញ​បាន​ធ្វើការ​សន្និដ្ឋាន​ថា​ជន​រង​គ្រោះ​ឈ្មោះ​ ម៉ក់​ តែម​ ភេទ​ប្រុស​ អាយុ​៧១​ឆ្នាំ​ ស្លាប់​ដោយ​លង់ទឹក​ប្រាកដ​មែន​ ព្រោះ​មូលហេតុ​ស្រវឹងស្រា​ទៅ​មើល​មង​ដាក់​ត្រី​នៅ​ចំណុច​លូ​តា​ផ​ន​ដៃ​អូរ​ភូមិ​ត្រស់​ បណ្ដាល​លង់ទឹក​ស្លាប់​ ។​

​បច្ចុប្បន្ន​ សាកសព​បាន​ប្រគល់​ឱ្យ​ក្រុម​គ្រួសារ​យក​ទៅ​ធ្វើបុណ្យ​តាម​ប្រពៃណី​ទំនៀមទម្លាប់​ ៕

មតិយោបល់