សៀមរាបៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ក្មេងប្រុសម្នាក់ត្រូវបានរថយន្តបុក បណ្តាលឲ្យស្លាប់ ខណៈរត់ឆ្លងផ្លូវ ដែលហេតុការណ៍នេះកើតឡើង នៅថ្ងៃសៅរ៍ ៣កើត ខែអស្សុជ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី៩ ខែតុលា ឆ្នាំ២០២១ វេលាម៉ោង១៤និង២០នាទី នៅលើកំណាត់ផ្លូវកៅស៊ូ ចំណុចភូមិគោកចាស់ ឃុំស្រែខ្វាវ ស្រុកអង្គរជុំ ខេត្តសៀមរាប ។
សមត្ថកិច្ចបានឲ្យដឹង រថយន្តបង្កហេតុម៉ាក ហ៊ីយាន់ដាយ ពណ៌ស ពាក់ស្លាកលេខ សៀមរាប 3A-3201 បើកបរដោយឈ្មោះ វ៉ឹង វ៉ាត់ ភេទប្រុស អាយុ២១ឆ្នាំ មានទីលំនៅភូមិស្នាយល្អ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ បានបើកបរក្នុងទិសដៅពីលិច ទៅកើត បានជ្រុលបុកក្មេងរត់ឆ្លងផ្លូវឈ្មោះ រឿត សុភា ភេទប្រុស អាយុ៥ឆ្នាំ មានទីលំនៅភូមិគោកចាស់ ឃុំស្រែខ្វាវ ស្រុកអង្គរជុំ ខេត្តសៀមរាប បណ្ដាលអោយស្លាប់ក្មេងប្រុសម្នាក់នៅនឹងកន្លែង ។
សមត្ថកិច្ចជំនាញបានអោយដឹងថា ករណីគ្រោះថ្នាក់ចរាចរណ៍ គឺបណ្តាលមកពីអ្នកបើកបររថយន្តបើកបរក្នុងល្បឿនលឿន ហើយក្មេងរត់ឆ្លងផ្លូវកាត់ខ្វះការប្រុងប្រយ័ត្ន ។
ក្រោយកើតហេតុ សមត្ថកិច្ចជំនាញបានចុះវាស់វែង ធ្វើកំណត់ហេតុ និងឃាត់ខ្លួនអ្នកបើកបរ រួមទាំងវត្ថុតាងយកមកអធិការដ្ឋានស្រុកអង្គរជុំ ដើម្បីកសាងសំណុំរឿងតាមនីតិវិធី ។ ចំណែកសាកសពក្មេងរងគ្រោះ សមត្ថកិច្ចបានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕
មតិយោបល់