កណ្ដាលៈ ថ្ងៃសៅរ៍ ៣កើត ខែអស្សុជ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃទី០៩ ខែតុលា ឆ្នាំ២០២១ វេលាម៉ោង១៣និង១៥នាទី មានករណីគ្រោះថ្នាក់ ចរាចរណ៍ផ្លូវគោក រថយន្តមិនស្គាល់អត្តសញ្ញាណបុកម៉ូតូ បណ្តាលឲ្យបុរសវ័យចំណាស់ម្នាក់ រងរបួសធ្ងន់ លើផ្លូវជាតិលេខ៥ ចន្លោះគីឡូម៉ែត្រ31- 32 ស្ថិតក្នុងភូមិពោធិ៍តូច ឃុំកំពង់ហ្លួង ស្រុកពញាឮ ខេត្តកណ្ដាល ។

សភាពនៃរឿងហេតុ៖ នៅថ្ងៃកើតហេតុខាងលើ មានរថយន្តមួយគ្រឿង (មិនស្គាល់អត្តសញ្ញាណរត់គេច ) បើកបរទិសដៅ ពីជើងទៅត្បូង (ឧដុង្គ – ភ្នំពេញ) ។ លុះពេលបើកបរមកដល់ចំណុចកើតហេតុខាងលើ បានបុកម៉ូតូម៉ាក HONDA CUB ពណ៌ខៀវ (គ្មានផ្លាកលេខ) បើកបរដោយឈ្មោះ ធួន ស៊ីថា ភេទប្រុស អាយុ៥៧ឆ្នាំ ទីលំនៅភូមិ ស្វាយរលំ សង្កាត់សិត្បូ ក្រុងតាខ្មៅ ខេត្តកណ្ដាល បណ្តាលអោយរងរបួសធ្ងន់ ។

ក្រោយពេលកើតហេតុ កម្លាំងប៉ុស្តិ៍នគរបាលរដ្ឋបាល កំពង់ហ្លួងបានចុះដល់កន្លែង រួចបានបញ្ជូនអ្នករបួសទៅព្យាបាល នៅមន្ទីរពេទ្យបង្អែកស្រុកពញាឮ រីឯវត្ថុតាងបានយកទៅរក្សាទុក ជាបណ្តោះអាសន្ននៅប៉ុស្តិ៍នគរបាលរដ្ឋបាលកំពង់ហ្លួង តាមនីតិវិធីផ្លូវច្បាប់ ៕