កណ្តាលៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃចន្ទ ១២កើត ខែអស្សុជ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៨ ខែតុលា ឆ្នាំ២០២១ វេលាម៉ោង១៤ និង៣៥នាទី មានករណីហិង្សាដោយចេតនា ចំណុចរង្វង់មូល លោកតាម៉ៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល ។
ជនរងគ្រោះ២នាក់៖ ១-ឈ្មោះ ហ៊ី ហឿន ភេទប្រុស អាយុ៤៧ឆ្នាំ ខ្មែរទីលំនៅភូមិទួលក្រសាំង សង្កាត់រការខ្ពស់ ក្រុងតាខ្មៅ ខេត្តកណ្តាល មុខរបររត់តាក់ស៊ី ។ ២-ឈ្មោះ ប៊ុន សុខហេង ភេទប្រុស អាយុ៤៨ឆ្នាំ ទីលំនៅស្នាក់នៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរយោធា ។ ចំណែកជនសង្ស័យ២នាក់៖ ១-ឈ្មោះ កុយ សុភា ភេទប្រុស អាយុ៣៧ឆ្នាំ ទីលំនៅភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល មុខរបរលក់ខោអាវ (ឃាត់ខ្លួន) ។ ២-ឈ្មោះ អ៊ួង ភេទប្រុស អាយុ៣៥ឆ្នាំ ទីលំនៅមិនពិតប្រាកដ មុខរបរកម្មករសំណង់ (គេចខ្លួន) ។
វត្ថុតាងចាប់យក៖ ដាវដែកដងឈើចំនួន១ ប្រវែង៦០ស.ម (របស់ជនសង្ស័យ) ។
នៅវេលាកើតហេតុខាងលើ ពេលដែលជនរងគ្រោះ និងមិត្តភក្តិកំពុងតែហូបបាយជុំគ្នា មានចំនួន០៤នាក់ ពេលនោះស្រាប់តែ ជនសង្ស័យឈ្មោះ កុយ សុភា បានជិះម៉ូតូ១គ្រឿងមិនចាំម៉ាកមកឈប់ក្បែរ ហើយបានបោះពាក្យសំដីថា ថ្ងៃនេះចង់ធ្វើឆ្កែស៊ីមួយ ឮដូច្នេះជនរងគ្រោះបាននិយាយថា នៅទីនេះគ្មានឆ្កែទេ មានតែមនុស្សពុំមានឆ្កែទេ បើចង់ស៊ីឆ្កែទៅរកកន្លែងផ្សេងទៅ ជនសង្ស័យតបវិញថា ចាំបន្តិចទៀតធ្វើស៊ីឥឡូវហើយ ហើយក៏ជិះម៉ូតូចេញទៅបាត់ ។
លុះប្រហែល២០នាទីក្រោយមក ស្រាប់តែជនសង្ស័យហៅបក្ខពួកមកម្នាក់ទៀតឈ្មោះ អ៊ួង ជាអ្នកបើកម៉ូតូ រីឯជនសង្ស័យឈ្មោះ កុយ សុភាជិះខាងក្រោយ ដោយមានកាន់ដាវមួយដើម ចុះមកដេញកាប់ទៅជនរងគ្រោះ តែមិនត្រូវទេព្រោះជនរងគ្រោះ បានរត់គេចចេញទាន់ ហើយរាយការណ៍ជូនសមត្ថកិច្ច អោយជួយអន្តរាគមន៍ឃាត់ខ្លួនជនសង្ស័យបានម្នាក់ឈ្មោះ កុយ សុភា រួមទាំងវត្ថុតាង បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីធ្វើការសាកសួរ និងកសាងសំណុំរឿងតាមនីតិវិធី ៕
មតិយោបល់