បាត់ដំបង: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី២៨ ខែតុលា ឆ្នាំ២០២១ វេលាម៉ោង១៥និង២០នាទី នៅតាមបណ្តោយផ្លូវលេខ១៥៧០ ចន្លោះគីឡូម៉ែត្រលេខ៧-៨ ស្ថិតនៅក្រុមទី១២ ភូមិថ្មី ឃុំតាគ្រាម ស្រុកបាណន់ មានករណីគ្រោះថ្នាក់ចរាចរណ៍ មួយកើតឡើង រវាងរថយន្តនិងម៉ូតូបើកបរច្រាស់គ្នា បណ្តាលឲ្យបុរសម្នាក់បានស្លាប់បាត់បង់ជីវិត ។
លោកវរសេនីយ៍ឯក ប៉ាន់ វ៉ាន់នី អធិការនគរបាលស្រុកបាណន់ បានរាយការណ៍ឲ្យដឹងថា គ្រោះថ្នាក់នេះបង្កឡើងដោយរថយន្តម៉ាកហ្វុយសូ ចង្កូតស្តាំ ពណ៌ខៀវលាយស ពាក់ស្លាកលេខ BMC-0103 ចង្កូតស្តាំ ប្រភេទបែន ពីត្បូងទៅជើងបើកបរដោយជនមិនស្គាល់អត្តសញ្ញាណ (រត់គេចខ្លួន) មកដល់ផ្លូវកោងចំណុចកើតហេតុខាងលើ បានបុកជាមួយម៉ូតូ១គ្រឿង ម៉ាកPCR (ភីស៊ីអរ) ពណ៌ក្រហម ពាក់ស្លាកលេខ កំពង់ធំ 1J-0178 បើកបរដោយឈ្មោះ ឌិត ម៉ែត ភេទប្រុស អាយុ៥២ឆ្នាំ មានទីលំនៅផ្ទះលេខ៧១ ក្រុមទី៥ ភូមិកំពងសីមា សង្កាត់វត្តគរ ក្រុងបាត់ដំបង បើកបរពីជើងទៅត្បូងមានមួកសុវត្ថិភាព បានស្លាប់ភ្លាមៗ នៅនឹងកន្លែងកើតហេតុ ។
ក្រោយទទួលដំណឹងកម្លាំងជំនាញនគរបាលស្រុក បានធ្វើការត្រួតពិនិត្យ និងវាស់វែង ឃើញថាមូលហេតុនៃគ្រោះថ្នាក់ចរាចរណ៍នេះគឺដោយសារអ្នកបើកបរម៉ូតូបើកបរក្នុងល្បឿនលឿន ចំណុចផ្លូវកោងទើបជ្រុលចង្កូតទៅបុករថយន្តពីមុខពេញទំហឹងបណ្តាលឲ្យស្លាប់នៅកន្លែងកើតហេតុ ។
ករណីនេះ សមត្ថកិច្ចបាននាំយកមធ្យោបាយបង្កទាំងពីរគ្រឿងទៅរក្សាទុក នៅអធិការដ្ឋាននគរបាលស្រុក រង់ចាំដំណោះស្រាយតាមនីតិវិធី ។ ចំណែកសាកសពបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី ៕
មតិយោបល់