បន្ទាយមានជ័យៈ អគ្គស្នងការដ្ឋាននគរបាលជាតិបានឲ្យដឹងថា បុរសម្នាក់ព្រោះតែអន់ចិត្តនិងប្រពន្ធ ស្តីបន្ទោសបន្តិចបន្តួចរឿងលក់គោមេ០២ក្បាល ដើម្បីជាសោហ៊ុយទៅរកការងារធ្វើនៅថៃ បែរជាមិនបានដូចបំណង បានធ្វើអត្តឃាតដោយយកក្រម៉ា ចង.ក ស្លាប់ខ្លួនឯងនៅនឹងដើមស្តៅចម្ងាយ៣០ម៉ែត្រខាងកើតផ្ទះបង្កការភ្ញាក់ផ្អើល ។ សពត្រូវបានគេប្រទះឃើញនៅ វេលាម៉ោង០៦និង១៥នាទី កាលពីព្រឹកថ្ងៃទី២២ ខែវិច្ឆិកា ឆ្នាំ២០២១ នៅភូមិយាងវៀន ឃុំផ្គាំ ស្រុកស្វាយចេកខេត្តបន្ទាយមានជ័យ ។
តាមប្រភពព័ត៌មានពីនគរបាលស្រុកស្វាយចេក បានឲ្យដឹងថា បុរសដែលធ្វើអត្តឃាតខ្លួនឯងឈ្មោះ ភន់ ប៉េង ភេទប្រុស អាយុ ៥៥ឆ្នាំ នៅភូមិយាងវៀន ឃុំផ្គាំ ស្រុកស្វាយចេក ខេត្តបន្ទាយមានជ័យ ។ នៅមុនពេលកើតហេតុ បុរសនេះបានលក់គោមេចំនួន០២ក្បាលឲ្យក្មួយ បានតម្លៃប្រមាណជា ១០ម៉ឺនបាត ដើម្បីយកលុយទៅធ្វើការនៅប្រទេសថៃ តែបែរជាមិនបានទៅដូចបំណងក៏នឹកស្តាយគោ ពេលនោះប្រពន្ធក៏និយាយថា បើកុំលក់គោមានអី ដល់លក់ហើយមិនបានទៅថៃដដែល ចំណែកលុយក៏ចាយជិតអស់ ។ដោយនឹកស្តាយគោផង និងលឺសំដីប្រពន្ធនិយាយនោះផង ។ ឈ្មោះ ភន់ ប៉េង បានគិតខ្លីក៏សម្រេចចិត្តធ្វើអត្តឃាតដោយចង.ក នៅនឹងដើមស្តៅជិតផ្ទះមិនដឹងជាស្លាប់នៅតាំងពីពេលណា លុះព្រឹកម៉ោង០៦និង១៥នាទី ទើបក្រុមគ្រួសារដឹង ។
តាមប្រភពដដែលបានបញ្ជាក់ថា ក្រោយពីទទួលបានព័ត៌មាន សមត្ថកិច្ចយើងបានចុះកន្លែងកើតហេតុដើម្បីធ្វើការពិនិត្យសពរួមទាំងមេភូមិ មេឃុំ លោកគ្រូពេទ្យ តាមការពិនិត្យនៅលើខ្លួនសព ពុំឃើញមានស្លាកស្នាមអ្វីពាក់ព័ន្ធនិងអំពើឃាតកម្មទេ ក្រុមការងារសន្និដ្ឋានថាឈ្មោះ ភន់ ប៉េង ពិតជាស្លាប់ដោយសារចងកសម្លាប់ខ្លួនឯងប្រាកដមែន ។
ក្រោយពិនិត្យរួច គណ:កម្មការយើងបានប្រគល់សាកសព ជូនក្រុមគ្រួសារចាត់ចែងធ្វើបុណ្យតាមប្រពៃណី ៕
មតិយោបល់