ត្បូងឃ្មុំៈ នៅថ្ងៃទី២៧ ខែវិច្ឆិកា ឆ្នាំ២០២១ វេលាម៉ោង ១និង៥០នាទីចំណុចក្នុងផ្នះឈ្មោះ ស៊េន ណាគីម៉ ភេទស្រី អាយុ ៣៣ឆ្នាំ ជនជាតិខ្មែរឥស្លាម ស្ថិតក្នុងភូមិទ្រាទី២ ឃុំទ្រា ស្រុកក្រូចឆ្មារ ខេត្តត្បូងឃ្មុំ មានករណីចោរកម្ម (លួចម៉ូតូ) មួយករណី បង្កឡើងដោយ ឈ្មោះ ស៊ុន សុខឡេង ភេទប្រុស អាយុ ២៦ឆ្នាំ ជនជាតិខ្មែរ មានទីលំនៅភូមិស្រក ឃុំស្រក ស្រុកកំពង់សៀម ខេត្តកំពង់ចាម ។ បានជិះម៉ូតូរបស់ខ្លួន មិនស្គាល់ម៉ាក (ម៉ូតូចាស់ មានតែឆ្អឹងនិងម៉ាស៊ីន) មកឈប់នៅមុខផ្ទះរបស់ឈ្មោះ ស៊េន ណាគីម៉ ហើយចូលលួចយកម៉ូតូម៉ាក ហុងដា (HONGDA) C125 ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ កំពង់ចាម 1N-1453 ដែលបញ្ឍរទុកនៅមុខទ្វារផ្ទះរបស់ខ្លួន ក្នុងភូមិ ឃុំខាងលើ ជិះគេចខ្លួន ខណៈនោះត្រូវបានអ្នកជិតខាងឃើញ ហើយក៏ស្រែក និងបានរាយការណ៍ មកសមត្ថកិច្ចដើម្បីឲ្យសមត្ថកិច្ចអន្តរាគមន៍ ។

ក្រោយទទួលបានព័ត៌មានភ្លាម សមត្ថកិច្ចរួមទាំងប្រជាពលរដ្ឋ បានដេញតាមប្រផាត់ប្រភីង ឆ្លងកាត់ស្ពានមិត្តភាពកម្ពុជា-ចិន ស្ទឹងត្រង់ ក្រូចឆ្មារ និង បានសហការជាមួយសមត្ថកិច្ច នៃអធិការដ្ឋាននគរបាលស្រុកស្ទឹងត្រង់។
ដេញមកដល់ហួសរង្វល់មូលគល់ស្ពាន ត្រើយខាងស្ទឹងត្រង់ ប្រហែល ៧០០ម៉ែត្រ ជនសង្ស័យខាងលើ បានដួលម៉ូតូ ហើយបានក្រោករត់គេចខ្លួន ចូលសំងំក្នុងព្រៃឫស្សី (ក្នុងភូមិសាស្រ្តភូមិបឹងដែង ឃុំព្រែកកក់ ស្រុកស្ទឹងត្រង់) ហើយត្រូវសមត្ថកិច្ចរុករកឃើញ និងចាប់ឃាត់ខ្លួនបាន នៅវេលាម៉ោង ២និង៤៥នាទី ថ្ងៃខែឆ្នាំ ដដែល ។

វត្ថុតាងដកហូតបាន៖
១.ម៉ូតូរបស់ជនរងគ្រោះ ០១គ្រឿង
២.ម៉ូតូរបស់ជនសង្ស័យ ជិះធ្វើសកម្មភាព ០១គ្រឿង (មានតែម៉ាស៊ីន និងគ្រោងឆ្អឹង) ។

បច្ចុប្បន្ន ជនសង្ស័យ រួមទាំងវត្ថុតាង ត្រូវបាននាំមកកាន់ អធិការដ្ឋាននគរបាលស្រុកក្រូចឆ្មារ ដើម្បីធ្វើការសាកសួរ និងកសាងសំនុំរឿងចាត់ការតាមនីតិវិធី៕