បន្ទាយមានជ័យៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរសវ័យចំណាស់ម្នាក់ និងស្ត្រីម្នាក់បានបាត់បង់ជីវិត ក្នុងឧប្បត្តិហេតុគ្រោះថ្នាក់ចរាចរណ៍ កើតឡើងនៅវេលាម៉ោង០៦និង១០នាទីយប់ ថ្ងៃទី០៥ ខែធ្នូ ឆ្នាំ២០២១ លើកំណាត់ផ្លូវជាតិលេខ៥ ស្ថិតក្នុងភូមិខៃដន ឃុំកូប ស្រុកអូរជ្រៅ ខេត្តបន្ទាយមានជ័យ ។
នគរបាលស្រុកអូរជ្រៅ បានប្រាប់ឲ្យដឹងថា ជនរងគ្រោះដែលស្លាប់ទាំង០២នាក់ ម្នាក់ឈ្មោះ សៀម យិង ភេទប្រុស អាយុ៦០ឆ្នាំ អ្នកបើកបរម៉ូតូនិងម្នាក់ទៀត ឈ្មោះ ហឿន ហេង ភេទស្រី អាយុ៤០ឆ្នាំ អ្នករួមដំណើរត្រូវជាក្មួយជនរងគ្រោះទាំង០២នាក់ រស់នៅភូមិខៃដន ឃុំកូប ស្រុកអូរជ្រៅ ខេត្តបន្ទាយមានជ័យ ។
នគរបាលបានបញ្ជាក់ថា នៅមុនពេលកើតហេតុ ជនរងគ្រោះបានជិះម៉ូតូម៉ាកហុងដាឌ្រីម ពណ៌ខ្មៅ ពាក់ស្លាកលេខ ប.មានជ័យ 1.C 3218 ឌុបក្មួយស្រី ក្នុងទិសដៅ ពីជើងមកត្បូង កាត់ទ្រូងថ្នល់ជាតិលេខ៥ ហើយបត់ឆ្វេងមកទិសខាងកើតវិញ ស្របពេលនោះ មានរថយន្ត មួយគ្រឿង ម៉ាកលិចស៊ីស GS300 ពាក់ស្លាកលេខ ប.មានជ័យ 2E. 9000 បើកបរក្នុងទិសដៅលិចទៅកើត មកដល់កន្លែងកើតហេតុ បានបុកម៉ូតូពេញទំហឹង បណ្តាលអោយស្លាប់បើកម៉ូតូ និងអ្នករួមដំណើរភ្លាមៗនៅនឹងកន្លែង ចំណែកម៉ូតូខូចខាតធ្ងន់ ។
ក្រោយពីកើតមានគ្រោះថ្នាក់ចរាចរណ៍ អ្នកបើកបររថយន្តបានរត់គេចខ្លួនបាត់ បន្សល់ទុកតែរថយន្តនៅកន្លែងកើហេតុ ។
ប្រភពដដែលបានបញ្ជាក់បន្ថែមថា កត្តាដែលបង្កឲ្យកើតមានគ្រោះថ្នាក់ចរាចរណ៍នេះ បណ្តាលមកពីអ្នកបើកបរម៉ូតូឆ្លងកាត់ថ្នល់ហើយបត់ឆ្វេងគ្មានការប្រុងប្រយ័ត្ន ចំណែករថយន្ដបើកបរក្នុងល្បឿនលឿន ។
បច្ចុប្បន្ន វត្ថុតាងម៉ូតូ និងរថយន្ត ត្រូវបានយកមករក្សាទុក នៅអធិការដ្ឋាននគរបាលស្រុកអូរជ្រៅ ដើម្បីស្រាវជ្រាវរកម្ចាស់រថយន្តមកដោះស្រាវតាមនីតិវិធី ។ ចំពោះសពត្រូវបានប្រគល់ជូនក្រុមគ្រួសារ ចាត់ចែងធ្វើបុណ្យតាមប្រពៃណី ៕
មតិយោបល់