ភ្នំពេញៈ ករណីគ្រោះថ្នាក់ចរាចរណ៍មួយដែល រថយន្តបែនមួយគ្រឿង បើកលឿនជ្រុលទៅបុករថយន្តឃ្លុប រុញទៅបុកម៉ូតូកង់បី បន្តរុញផ្ទប់ទៅនឹងរថយន្តទ្រុងមួយគ្រឿងទៀតដែលកំពុងរយ៊ែរថយក្រោយ បណ្តាលឲ្យគរលើគ្នា សំណាងល្អមិនបង្កឲ្យមានអ្នករងរបួសធ្ងន់ បង្កការភ្ញាក់ផ្អើល កាលពីវេលាម៉ោង ៦និង៤០នាទីព្រឹក ថ្ងៃទី១៤ ខែធ្នូ ឆ្នាំ២០២១ នៅតាមផ្លូវហាណូយ ចំណុចខាងជើងក្បែរវត្តឃ្មួញ ភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ។

តាមប្រភពនៅកន្លែងបានឲ្យដឹងថា មុនកើតហេតុ រថយន្តបង្កប្រភេទ បែនពណ៌ខៀវ ពាក់ស្លាកលេខ ភ្នំពេញ 3D-1660 បើកល្បឿនលឿន ពីត្បូងទៅជើង ដល់ចំណុចកើតហេតុ ហ្វ្រាំងមិនជាប់ ក៏ជ្រុលបុកពីក្រោយរថយន្ត ម៉ាកស្តារិច ឃ្លុប ពណ៌ស ពាក់ស្លាកលេខ ភ្នំពេញ2BM-2964 រុញទៅបុកនឹង រ៉ឺម៉កម៉ូតូកង់បី ឌ្រីម ពណ៌ខ្មៅ ពាក់ស្លាកលេខ ភ្នំពេញ 1BH-1948 រុញផ្ទប់ទៅនឹងរថយន្ត ម៉ាកនីសាន់ ពណ៌ខៀវ ស ពាក់ស្លាកលេខ ស្វាយរៀង 3A-0620 ដែលកំពុងរយ៊ែរថយក្រោយចេញពីការ៉ាស់ បណ្តាលឲ្យម៉ូតូកង់បី ជាប់គរលើរថយន្តមួយគ្រឿង ធ្វើឲ្យអ្នកបើកម៉ូតូកង់បី រងរបួសស្រាល ។

ក្រោយកើតហេតុ សមត្ថកិច្ចចុះទៅអន្តរាគមន៍ ដើម្បីសម្រួលចរាចរ រួចរាយការណ៍ទៅជំនាញផ្នែកចរាចរណ៍ វាស់វែងយកទៅរក្សាទុក រង់ចាំដោះស្រាយនៅពេលក្រោយ ៕