ភ្នំពេញៈ នៅវេលាម៉ោង០២និង៣០នាទី រំលងអធ្រាត្រឈានចូលថ្ងៃទី១៤ ខែធ្នូ ឆ្នាំ២០២១ មានករណីគ្រោះថ្នាក់ចរាចរណ៍ មួយបានកើតឡើង បុរសម្នាក់បើករថយន្ត អាលផាត ស៊េរីទំនើបមួយគ្រឿង ក្នុងល្បឿនលឿន ជ្រុលទៅបុករបងផ្សាររាត្រី ពេញទំហឹង បណ្ដាលឲ្យរងការខូចខាត បាក់អស់មួយផ្ទាំង រីឯរថយន្តបង្កវិញ រងការខូចខាតមួយកំណាត់មុខ ស្ទើរទាំងស្រុង ស្ថិតតាមបណ្ដោយផ្លូវ ព្រះស៊ីសុវត្ថិ កែងនឹងផ្លូវ១០៦ ត្រង់ចំណុចផ្សាររាត្រី សង្កាត់វត្តភ្នំ ខណ្ឌដូនពេញរាជធានីភ្នំពេញ ។

នៅមុនពេលកើតហេតុ គេឃើញបុរសម្នាក់ បើករថយន្តម៉ាក អាលផាត ពណ៌ស ស៊េរីទំនើប មួយគ្រឿង ពាក់ស្លាកលេខភ្នំពេញ 2BA-3566 ធ្វើដំណើរតាមបណ្ដោយផ្លូវព្រះស៊ីសុវត្ថិ ទិសដៅពីជើងទៅត្បូង ក្នុងល្បឿនយ៉ាងលឿន ខណៈមកដល់ត្រង់ចំណុចកើតហេតុ បានបួងចង្កូតរេទៅបុកចូលរបងផ្សាររត្រី បណ្ដាលឲ្យរថយន្តខ្ទេចមួយកំណាត់មុខ និងរងការខូចខាត របងមួយផ្ទាំងតែប៉ុណ្ណោះ សំណាងល្អមិនមាននរណាម្នាក់រងគ្រោះថ្នាក់ ។

ក្រោយពេលកើតហេតុ ដោយភាគីម្ចាស់រថយន្តបង្ក សម្របសម្រួលជាមួយនឹងម្ចាស់ផ្សារ ព្រមសងសំណងក្នុងការជួសជុល ដើម្បីបញ្ចប់រឿងនៅនឹងកន្លែងកើតហេតុ ៕