ព័ត៌មានជាតិ

សូមប្រុងប្រយ័ត្ន! ក្មេងអាយុ ១ឆ្នាំ លង់ទឹកពាងខាប់មុខផ្ទះ

បន្ទាយមានជ័យ: យោងតាមផេកអគ្គស្នងការដ្ឋាននគរបាលជាតិបានឲ្យដឹងថា ក្មេង​ប្រុស​អាយុ​ ១​ឆ្នាំ​ បាន​លង់ទឹក​ពាង​សម្រាប់​ស្រោច​ដំណាំ​ក្នុង​ចម្ការ​បណ្តាល​ឲ្យ​ស្លាប់​បង្ក​ឲ្យ​មានការ​ភ្ញាក់ផ្អើល​នៅ​វេលា​ម៉ោង​ ១៣​និង​៣០​នាទី​ ថ្ងៃ​ទី​១៨​ខែធ្នូ​ ឆ្នាំ​២០២១​ នៅ​ភូមិ​ភ្នំ​ធំ​ត្បូង​ ឃុំ​អូរ​ប្រាសាទ​ ស្រុក​មង្គល​បូ​រី​ ខេត្តបន្ទាយមានជ័យ​ ។​

​សមត្ថកិច្ច​មូលដ្ឋាន​បាន​ឲ្យ​ដឹង​ថា​៖​ ក្មេង​រង​គ្រោះ​ឈ្មោះ​ សុភ​ត់​ រតនា​ អាយុ ១​ឆ្នាំ​ នៅ​ភូមិ​ភ្នំ​ធំ​ត្បូង​ ឃុំ​អូរ​ប្រាសាទ​ ស្រុក​មង្គល​បូ​រី​ ខេត្តបន្ទាយមានជ័យ​ ម្តាយ​ឈ្មោះ​ យ៉ា​ ស្រី​រ័​ត្ន​ អាយុ ​២៧​ឆ្នាំ​ លក់ដូរ​នៅ​នឹង​ផ្ទះ​និង​ឪពុក​ឈ្មោះ​ រ៉ា​ន់​ សុភ​ត់​ អាយុ​ ៣១​ឆ្នាំ​ ទៅ​ធ្វើការ​នៅ​ប្រទេស​ថៃ​។​

​នគរបាល​បាន​បញ្ជាក់​ទៀត​ថា​៖​ ជា​រៀងរាល់ថ្ងៃ​ក្មេង​រង​គ្រោះ​ ត្រូវ​បាន​ជីដូន​នាំ​យក​ទៅ​លេង​មើលថែ​នៅ​ឯ​ផ្ទះ​របស់​ក្នុង​ចម្ការ​ ដោយ​ម្តាយ​របស់​ក្មេង​រង​គ្រោះ​ជាប់រវល់​ល់​ដូរ​ ។​ នៅ​មុន​ពេល​កើតហេតុ​ ជីដូន​ឈ្មោះ​ លាភ​ អាយុ​ ៦៧​ឆ្នាំ​ បាន​យក​ចៅ​ទៅ​លេង​នៅផ្ទះ​របស់​ក្នុង​ចម្ការ​ និង​ថែទាំ​ដូច​សព្វមួយដង​ ហើយ​នៅ​ថ្ងៃ​កើតហេតុ​ សង្ស័យ​គាត់​រវល់​មើល​ដំណាំ​ក្នុង​ចម្ការ​ ហើយ​ក្មេង​រង​គ្រោះ​បាន​រត់​លេង​នៅ​ទីនោះ​ ។​ ក្រោយ​ពី​បាត់​ចៅ​ក៏​ស្រែកហៅ​មិន​ឮ​ឆ្លើយ​ គាត់​បាន​ដើរ​រក​ស្រាប់តែ​ឃើញ​ចៅ​ស្លាប់​នៅ​ក្នុង​ពាង​ខាប់​មានទឹក​ជិត​ពេញ​នៅ​ខាង​មុខ​ផ្ទះ​ចម្ងាយ​ប្រមាណ​ជា​៧​ម៉ែត្រ​ ។​

​នគរបាល​បាន​បញ្ជាក់​ទៀត​ថា​៖ ​ក្រោយ​ពី​ទទួល​បាន​ព័ត៌មាន​ ក៏​បាន​បង្កើត​ក្រុមការងារ​ ចុះ​ទៅ​ពិនិត្យ​សាកសព​ ឃើញ​ថា​ក្មេង​រង​គ្រោះ​ពិតជា​ស្លាប់​ដោយសារ​លង់​ពាង​(​ខាប់ដាក់ទឹក​)​ ប្រាកដ​មែន​។​ ក្រោយ​ពិនិត្យ​រួច​ បាន​ប្រគល់​ជូន​ម្តាយ​រៀបចំ​ធ្វើបុណ្យ​តាម​ប្រពៃណី​ ៕

មតិយោបល់