បាត់ដំបងៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា មានករណីហិង្សាដោយចេតនា មានស្ថានទម្ងន់ទោសមួយកើតឡើង បង្កដោយបុរសម្នាក់បានយកដែកប្រវែង ១ម៉ែត្រ វាយទៅលើម្ដាយចុងរបស់ខ្លួន បណ្តាលអោយរងរបួសធ្ងន់ធ្ងរ រួចបន្តដុតបំផ្លាញលំនៅដ្ឋានរបស់ខ្លួនទៀត ដោយសារខឹងម្ដាយចុងស្ដីបន្ទោសខ្លួន ។
ហេតុការណ៍ដ៏រន្ធត់នេះ កើតឡើងនៅថ្ងៃទី១៧ ខែធ្នូ ឆ្នាំ២០២១ វេលាម៉ោង ៩និង១០នាទីយប់ ចំណុចវត្តភ្នំស្លឹក ស្ថិតក្នុងភូមិបឹងអំពិល ឃុំស្ដៅ ស្រុករតនមណ្ឌល ខេត្តបាត់ដំបង ។
លោកវរសេនីយ៍ឯក សន និល អធិការនគរបាលស្រុកររនមណ្ឌល បានអោយដឹងថា ជនល្មើសប្រព្រឹត្តិអំពើហិង្សាខាងលើឈ្មោះ ណាត មករា ភេទប្រុស អាយុ ២៥ឆ្នាំ រស់នៅចំណុចកើតហេតុខាងលើ បានធ្វើសកម្មភាពយកដែកប្រវែង ១ម៉ែត្រ វាយទៅលើម្ដាយចុងរបស់ខ្លួនឈ្មោះ សុខ យីម អាយុ ៥៨ឆ្នាំ បណ្ដាលអោយបាក់ដៃខាងស្ដាំ របួសខ្នងជើងខាងស្ដាំ និងបែកក្បាលផ្នែកខាងស្ដាំ (រងរបួសធ្ងន់បញ្ជូនទៅមន្ទីរពេទ្យខេត្ត)។
ក្រោយធ្វើសកម្មភាពរួច ជនសង្ស័យបានដុតបំផ្លិចបំផ្លាញលំនៅឋានរបស់ខ្លួនមានទំហំ ៣ម៉ែត្រ x ៤ម៉ែត្រ (ធ្វើអំពីឈើប្រក់ស័ង្កសីជញ្ជាំងស័ង្កសី) ព្រមទាំងឆេះម៉ូតូចាស់ចំនួន ០២គ្រឿង ខូចខាតទាំងស្រុង ។
ករណីនេះ សមត្ថកិច្ចបានឃាត់ខ្លួនជនសង្ស័យយកមកកាន់អធិការដ្ឋាននគរបាលស្រុករតនមណ្ឌល និងរៀបចំសំណុំរឿង ដើម្បីបញ្ជូនទៅការិយាល័យជំនាញខេត្ត ដើម្បីអនុវត្តបន្តតាមនីតិវិធី ៕
![](https://i0.wp.com/cdn.pnm.news/2021/12/postnews.com.kh.2021-12-19_15-41-11.jpg?resize=640%2C428&ssl=1)
មតិយោបល់