កំពង់ស្ពឺៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា ករណីគ្រោះថ្នាក់ចរាចរណ៍ រថយន្ដរេចង្កូតបុកចូលរោងលាងម៉ូតូ កាលពីយប់ថ្ងៃអង្គារ ទី២៨ ខែធ្នូ ឆ្នាំ២០២១ វេលាម៉ោង២២និង៣០ នាទី នៅលើកំណាត់ផ្លូវលេខ១០៦ ស្ថិតនៅភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ។
មានរថយន្ដ០១គ្រឿង ម៉ាក LEXUS 470 ពណ៌ស ស្លាកលេខភ្នំពេញ 2AU-0323 អ្នកបើកបរឈ្មោះ ចាន់ អេរិច ភេទប្រុស អាយុ៣៦ឆ្នាំ រស់នៅភូមិពង្រ សង្កាត់កណ្ដោលដុំ ក្រុងច្បារមន ខេត្តកំពង់ស្ពឺ បើកបរពីទិសខាងលិចទៅទិសខាងកើត ហើយបានរេចង្កូតមកខាងស្ដាំដៃ ចូលទៅបុករោងលាងម៉ូតូ ដែលមានម្ចាស់ឈ្មោះ គង់ ឆៃយ៉ា ភេទប្រុស អាយុ៥៥ឆ្នាំ រស់នៅភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ បណ្តាលឲ្យខូចខាតសម្ភារៈ រោងលាងម៉ូតូចំនួន ០១រោង ខូចទ្វាររមូចំនួន ០១ (ខ្ទេចទាំងស្រុង) ខូចរថយន្ដ០១គ្រឿងធ្ងន់ និងខូចសម្ភារៈមួយចំនួនទៀត ។
បច្ចុប្បន្នជំនាញចរាចរណ៍ បានចុះពិនិត្យនិងយកវត្ថុតាង រថយន្ដយកមករក្សាទុក នៅការិយាល័យនគរបាលចរាចរណ៍ខេត្ត ដើម្បីចំណាត់ការនីតិវិធីបន្ដ រីឯអ្នកបើកបររថយន្តត្រូវនាំយកមកសាកសួរ នៅការិយាល័យចរាចរណ៍ផ្លូវគោក ៕
មតិយោបល់