កំពង់ស្ពឺៈ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា បុរស២នាក់បានស្លាប់ នៅក្នុងហេតុការណ៍គ្រោះថ្នាក់ចរាចរណ៍ បង្កឡើងរវាងរថយន្តនិងម៉ូតូ ។ ហេតុការណ៍នេះកើតឡើងនៅថ្ងៃទី៣១ ខែធ្នូ ឆ្នាំ២០២១ វេលាម៉ោង២០និង៥៥នាទី លើកំណាត់ផ្លូវជាតិលេខ៤ (៣៧-៣៨) ត្រង់ចំណុចភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ។
សមត្ថកិច្ចបានឲ្យដឹងថា មុនពេលកើតហេតុ មានរថយន្ត១គ្រឿងម៉ាកសាំយ៉ុង ពណ៌ស ពាក់ស្លាកលេខភ្នំពេញ 2AD-7745 អ្នកបើកបរមិនស្គាល់អត្តសញ្ញាណ (ចុះគេចខ្លួនក្រោយពីកើតហេតុ) ធ្វើដំណើរក្នុងទិសដៅពីលិចទៅកើត ។ មកដល់ចំណុចខាងលើបានប៉ះទង្គិចជាមួយម៉ូតូ១គ្រឿង ម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខកណ្តាល 1CU-9775 ធ្វើដំណើរបញ្ច្រាសទិសគ្នា បើកបរដោយឈ្មោះ ហួន រាត្រី ភេទប្រុស អាយុ ១៩ឆ្នាំ និងអ្នករួមដំណើរម្នាក់ឈ្មោះ សុវណ្ណ សីហា ភេទប្រុស អាយុ ១៨ឆ្នាំ អ្នកទាំងពីរ រស់នៅភូមិព្រៃពួច ឃុំព្រៃពួច ស្រុកអង្គស្នួល ខេត្តកណ្តាល ។
ក្នុងហេតុការណ៍នេះ បណ្តាលឲ្យអ្នកជិះម៉ូតូម្នាក់ស្លាប់នៅកន្លែងកើតហេតុ និងឈ្មោះ សុវណ្ណ សីហា ស្លាប់នៅមន្ទីរពេទ្យ ។
ក្រោយកើតហេតុរួច សមត្ថកិច្ច ធ្វើការវាស់វែង និងប្រគល់សពអោយក្រុមគ្រួសារ ធ្វើបុណ្យតាមប្រពៃណី ។ ចំណែកមធ្យោបាយទាំង២គ្រឿងនាំយកទៅរក្សាទុក នៅអធិការដ្ឋាននគរបាលស្រុកសំរោងទង ដើម្បីចាត់ការតាមនីតិវីធី ៕
មតិយោបល់