សៀមរាបៈ យោងតាមផេក ការិយាល័យផ្សព្វផ្សាយតាមបណ្តាញសង្គម បានឲ្យដឹងថា នៅថ្ងៃទី២៣ ខែមករា ឆ្នាំ២០២២ វេលាម៉ោង ១៦ និង១០ នាទី ត្រង់ចំណុចផ្លូវចូលទៅភូមិបាក់អង្រុត ស្ថិតនៅក្នុងភូមិគោករមាស ឃុំគោកធ្លកក្រោម ស្រុកជីក្រែង ខេត្តសៀមរាប ចន្លោះបង្គោលគីឡូម៉ែត្រ២៦១ និង២៦២ លើផ្លូវជាតិលេខ០៦ មានករណីគ្រោះថ្នាក់ចរាចរណ៍រវាងរថយន្តម៉ាក HYUNDAI ផលិតឆ្នាំ1999 ពាក់ស្លាកលេខ ភ្នំពេញ 2W-4453 ប្រភេទដឹកទំនិញធុនតូច ពណ៌ ខៀវ

អ្នកបើកបរមិនស្គាល់អត្តសញ្ញាណ មានទិសដៅពីខាងលិច ទៅទិសខាងកើតបានបុកម៉ូតូម៉ាក HONDA WAVE ផលិតឆ្នាំ2001 ពាក់ស្លាកលេខ ភ្នំពេញ1AP-5720 ប្រភេទស្រី ពណ៌ក្រហម អ្នកបើកបរឈ្មោះ សុខ សារុំ ភេទប្រុស អាយុ៥៨ឆ្នាំ រស់នៅភូមិបេង ឃុំគោកធ្លកក្រោម ស្រុកជីក្រែង ខេត្តសៀមរាប ក្នុងទិសដៅពីត្បូងទៅទិសខាងជើង ។

សមត្ថកិច្ចបានបញ្ជាក់ ក្នុងហេតុការណ៍គ្រោះថ្នាក់ចរាចរណ៍នេះ បណ្តាលអោយស្លាប់អ្នកបើកបរម៉ូតូម្នាក់ឈ្មោះ សុខ សារុំ (មិនពាក់មួកសុវត្តិភាព) ខូតខាតម៉ូតូចំនួន០១គ្រឿង (ស្រាល) និងរថយន្តចំនួន០១គ្រឿង (ស្រាល ) ។ ក្រោយកើតហេតុអ្នកបើកបររថយន្តបានរត់គេចខ្លួន ។

ក្រោយពីសមត្ថកិច្ចពិនិត្យ និងធ្វើកំណត់ហេតុរួច ហើយក៏ប្រគល់សពជនរងគ្រោះ ទៅក្រុមគ្រួសារធ្វើបុណ្យតាមប្រពៃណី ។ ចំណែកវត្ថុតាង សមត្ថកិច្ចយកមករក្សានៅអធិការដ្ឋាននគរបាលស្រុកជីក្រែង និងកំពុងស្រាវជ្រាវរកអ្នកបើកបរ ៕