កណ្តាលៈ នៅថ្ងៃអាទិត្យ ១៣រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៣០ ខែមករា ឆ្នាំ២០២២ វេលាម៉ោង ០០និង១៥នាទីយប់ មានករណីជនសង្ស័យចំនួន០៣នាក់ ធ្វើសកម្មភាពលួចដែក ត្រូវម្ចាស់ឃើញទាន់ឃាត់ខ្លួនបាន ប្រគល់ឲ្យសមត្ថកិច្ចប៉ុស្តិ៍ឈើទាល នៅត្រង់ចំណុចមុខផ្ទះជនរងគ្រោះ ស្ថិតនៅភូមិព្រែកស្វាយ ឃុំឈើទាល ស្រុកកៀនស្វាយ ខេត្តកណ្តាល ។

ជនរងគ្រោះឈ្មោះ ឈឿន សុថៃ ភេទប្រុស អាយុ១៩ឆ្នាំ ជនជាតិខ្មែរ មុខរបរលក់គ្រឿងសំណង់ មានទីលំនៅភូមិ-ឃុំកើតហេតុ ។
សម្ភារៈបាត់បង់៖ -ដែក សសៃចំនួន៣ដុំ ទម្ងន់១០គីឡូក្រាម ។ ចំណែកជនសង្ស័យមានគ្នាចំនួន0៣នាក់៖
១-ឈ្មោះ អ៊ុល សារិន ហៅស្វិត ភេទប្រុស អាយុ ៣៧ឆ្នាំ ជនជាតិខ្មែរ មុខរបរ កម្មករសំណង់ (ឃាត់ខ្លួន) ។
២-ឈ្មោះ ជឿន វ៉េត ហៅញ៉ាន់ ភេទប្រុស អាយុ ៣០ ឆ្នាំ ជនជាតិខ្មែរ មុខរបរ ដើររើសអេតចាយ (ឃាត់ខ្លួន) ។
៣-ឈ្មោះ ចាន់ ថា ភេទប្រុស អាយុ ២៣ ឆ្នាំ ជនជាតិ ខ្មែរ មុខរបរ ដើររើសអេតចាយ (ឃាត់ខ្លួន) ។
អ្នកទាំង៣មានទីលំនៅភូមិ ដើមស្នែង សង្កាត់ច្បារអំពៅ២ ខណ្ឌច្បារអំពៅ រាជធានី ភ្នំពេញ ។

វត្ថុចាប់ចាប់យក៖ ១-ទុលឡឺវីស ចំនួន ០៥ដើម ។ ២-កូនសោរ ចំនួន ០២ដើម ។ ៣-ដែកកាប់ ចំនួន ០១ដើម ។
៤-កន្ត្រៃចំនួន ០១ដើម ។ ៥-កាំបិតប៉័ងតោចំនួន ០១ដើម ។ ៦-ញញួរ ចំនួន ០១ដើម ។ ៧-ចង្កិះលេខម៉ូតូចំនួន ០១ដើម ។
៨-កាបូកលុយចំនួន០១ ។ ៩-ម៉ូតូសណ្តោងជាប់រទេះចំនួន០១គ្រឿង ។

សភាពនៃរឿងហេតុ៖ នៅមុនពេលកើតហេតុ ជនរងគ្រោះបានបិទទ្វាររបងផ្ទះចូលសម្រាកក្នុងផ្ទះ ជាមួយក្រុមគ្រួសារ ស្រាប់តែឮសំឡេងដូចមានគេរើ កកាយរបស់របរនៅមុខផ្ទះ ក៏ក្រោកមើលតាមកាំម៉េរ៉ាសុវត្ថិភាព រួចបានឃើញជនសង្ស័យខាងលើ កំពុងធ្វើសកម្មភាពលួចយកដែក ដែលទុកនៅមុខផ្ទះ លើកដាក់លើរ៉ឺម៉ក ភ្លាមនោះជនរងគ្រោះបានចេញមកមើល ជាមួយបងប្អូននិងឃាត់ជនសង្ស័យទាំង៣បាន រួចរាយការណ៍មកកម្លាំងប៉ុស្តិ៍ឈើទាល ។ ក្រោយពីទទួលបានព័ត៌មាន កម្លាំងប៉ុស្តិ៍បានចុះអន្តរាគមន៍ បន្ទាប់ពីសមត្ថកិច្ចបានចុះទៅកន្លែងកើតហេតុ បានឃាត់ខ្លួនជនសង្ស័យទាំង៣ខាងលើ រួមទាំងវត្ថុតាងមកសាកសួរបន្តនៅប៉ុស្តិ៍ឈើទាល ។

នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានប្រព្រត្តឹសកម្មភាព លួចយកដែករបស់ជនរងគ្រោះ ពិតប្រាកដមែន ហើយកន្លងមកប្រហែល១ខែមុនមិនចាំថ្ងៃ ជនសង្ស័យធ្លាប់បានធ្វើសកម្មភាព លួចយកដែកគេម្តងដែល នៅម្តុំឃុំឈើទាល នឹងធ្លាប់ប្រើប្រាស់គ្រឿងញៀនជាប្រចាំ ។

ក្រោយពីសាកសួររួច ជនសង្ស័យរួមជាមួយវត្ថុតាងខាងលើ ត្រូវបានបញ្ជូនទៅកាន់អធិការនគរបាលស្រុកកៀនស្វាយ ដើម្បីចាត់ការតាមនីតិវិធី ៕