ព្រះសីហនុៈ នៅវេលាម៉ោង២០និង០៩ នាទី ថ្ងៃទី៣០ ខែមករា ឆ្នាំ២០២២ មានករណីគ្រោះថ្នាក់ចរាចរណ៍ មួយបានកើតឡើង រវាងរថយន្តនិងម៉ូតូបុកគ្នា បណ្តាលឲ្យមនុស្សស្លាប់ម្នាក់ នៅត្រង់ចំណុចចន្លោះគីឡូម៉ែត្រ ១៥៨-១៥៩ ស្រុកព្រៃនប់ ខេត្តព្រះសីហនុ ។

ករណីគ្រោះថ្នាក់ចរាចរណ៍ខាងលើ គេឃើញមានរថយន្តធុនធំមួយគ្រឿងម៉ាក Hyundai ពណ៌ផ្កាឈូក ពាក់ស្លាកលេខ ភ្នំពេញ 3A-4460 បើកបរធ្វើដំណើរក្នុងទិសដៅពីព្រះសីហនុ-ឆ្ពោះទៅភ្នំពេញ (អ្នកបើកបររត់គេចខ្លួន) ។ លុះពេលធ្វើដំណើរមកត្រង់ ចំណុចកើតហេតុបានបុកម៉ូតូមួយគ្រឿងម៉ាក Dream ១២៥ស៊េរី០១៧ ពណ៌ខ្មៅ ពាក់ស្លាកលេខ ព្រះសីហនុ 1G-5356 ដែលមានទិសដៅបញ្ច្រាសគ្នាពីភ្នំពេញ-ឆ្ពោះទៅព្រះសីហនុ បណ្តាលឲ្យស្លាប់ម្នាក់នៅនឹងកន្លែងកើតហេតុ ជនរងគ្រោះមិនទាន់ស្គាល់ អត្តសញ្ញាណ នូវឡើយ ហើយក៏ពុំទាន់ដឹងទិសដៅនោះដែរ ។

នៅក្រោយពេលកើតហេតុ កម្លាំងសមត្ថកិច្ចនគរបាល ស្នាក់ការ៤០១ និងអធិការដ្ឋាននគរបាលស្រុកព្រៃនប់ យកវត្ថុតាងទាំងពីរគ្រឿង ទៅរក្សាទុកជាបណ្តោះអាសន្ន ដើម្បីស្វែងរកម្ចាស់រថយន្តបង្កហេតុ យកមកផ្តន្ទាទោសតាមផ្លូវច្បាប់ ។ ចំណែកសាកសពជនរងគ្រោះ សមត្ថកិច្ចក៏កំពុងស្រាវជា្រវរកសាច់ញាតិមកទទួលយកទៅធ្វើបុណ្យតាមប្រពៃណីផងដែរ ៕