បន្ទាយមានជ័យ: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា ក្រុមជនជំនាញខាងជិះម៉ូតូឆក់ ទូរស័ព្ទ ខ្សែក ការបូបលុយ និងទ្រព្យសម្បត្តិ របស់ប្រជាពលរដ្ឋនៅជាយដែនកម្ពុជា-ថៃ ត្រូវបាននគរបាលក្រុងប៉ោយប៉ែត ឃាត់ខ្លួនបានជាបន្តបន្ទាប់ និងបញ្ជូនទៅតុលាការហើយ នៅថ្ងៃទី០៥ ខែកុម្ភ: ឆ្នាំ២០២២នេះ ។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា ក្រោមការដឹកនាំបញ្ជាផ្ទាល់ និងការចង្អុលបង្ហាញពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ លោកបានដឹកនាំកម្លាំងក្រោមឱវាទចុះស្រាវជ្រាវ និងបានឃាត់ខ្លួនជនសង្ស័យចំនួន០៤នាក់ រួមមាន ១/ឈ្មោះ នី ផានិត ភេទប្រុស អាយុ១៨ឆ្នាំ (ឆក់និងកាប់) ។ ២/ឈ្មោះ ធន់ ពិសិដ្ឋ ភេទប្រុស អាយុ១៧ឆ្នាំ (អ្នកបើកម៉ូតូដឹកគេឆក់) ។ ៣/ឈ្មោះ ប៉ែន សុខលាភ ភេទប្រុស អាយុ១៧ឆ្នាំ ជនដៃដល់ (អ្នកឆក់) និង៤/ឈ្មោះលឹម ទីយ៉ា ភេទស្រី អាយុ១៨ឆ្នាំ ជាប្រពន្ធរបស់ឈ្មោះ នី ផានិត បានសារភាពថា ខ្លួនបានគ្នាប្តីប្រពន្ធជាងមូយឆ្នាំហើយ ទើបតែដឹងថាប្តីជាចោរឆក់ ។
ពាក់ពន្ធ័ករណីខាងលើនេះ លោកឧត្តមសេនីយ៍ត្រី នូ ជីវ័ន្ត ស្នងការរងទទួលផែនការងារព្រហ្មទណ្ឌ បានឲ្យដឹងថា ការឃាត់ខ្លួនជនសង្ស័យទាំង៤នាក់ គឺធ្វើឡើងក្រោយពីមានពលរដ្ឋរងគ្រោះ០២នាក់ បានប្តឹងថា ពួកខ្លួនត្រូវបានក្រុមចោរឆក់ទូរស័ព្ទ និងប្រើហិង្សាលើខ្លួននៅចំណុចផ្លូវបំបែកកែងលក់ជ្រូកខ្វៃផ្សារអគ្គ:ថ្មី កាលពីយប់ថ្ងៃទី០៣ ខែកុម្ភ: ឆ្នាំ២០២២ វេលាម៉ោង២០និង៤០នាទីយប់ ។
បច្ចុប្បន្ន កម្លាំងការិយាល័យជំនាញ បានកសាងសំណុំរឿង ដើម្បីបញ្ជូនទៅតុលាការ ចាត់ការបន្តតាមច្បាប់ ៕
មតិយោបល់