ភ្នំពេញៈ ពិតជាសំណាងមែនទែន ដែលរថយន្តដឹកគ្រឿងចក្រសម្រាប់បុកគ្រឹះ មួយគ្រឿង កំពុងបើកបរ ស្រាប់តែរអិលធ្លាក់គ្រឿងចក្រចេញពីរថយន្ត សំណាងល្អគ្រាន់តែខូចខាតតែសម្ភារ: ហេតុការខាងលើ បង្កការភ្ញាក់ផ្អើល កាលពីវេលាម៉ោង១១និង៤៥នាទីព្រឹក ថ្ងៃទី០១ ខែមីនា ឆ្នាំ២០២២ នៅតាមផ្លូវ៣០ម៉ែត្រ ខាងលិចបុរីសន្តិភាព២ ចំណុចភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។

តាមប្រភពនៅកន្លែងកើតហេតុបានឲ្យដឹងថា នៅមុនកើតហេតុ គេបានឃើញ រថយន្តធុនធំ ម៉ាកហ៊ីយ៉ាន់ដាយ ពណ៌ស អូសណ្តោងរ៉ឺម៉ក មានដឹកគ្រឿងគ្មានស្លាកលេខ ដែលដឹកគ្រឿងចក្រសម្រាប់បុកគ្រឹះមួយគ្រឿងនៅពីលើ បើកតាមបណ្តោយផ្លូវ៣០ម៉ែត្រ ពីលិចទៅកើត ដល់ចំណុចកើតហេតុ សង្ស័យតែដោយសារការរៀបចំដឹកជញ្ជូនមានការ ធ្វេសប្រហែស ទើបរអិលធ្លាក់ចុះពីលើរថយន្ត សំណាងល្អមិនបង្កឲ្យអ្នកណារងរបួស និងប៉ះពាល់ដល់ទ្រព្យសម្បត្តិរបស់អ្នកដទៃឡើយ ។

ក្រោយកើតហេតុ សមត្ថកិច្ចចុះទៅពិនិត្យ ជួយសម្រួលចរាចរណ៍ ហើយឲ្យម្ចាស់យករថយន្តស្ទូចទៅលើក ដាក់ចុះ និងរៀបចំដឹកចេញបន្តទៀត ៕