-

អាណោចអាធ័មណាស់! ក្មេង​ប្រុស​ស្រី​ពីរ​នាក់​ ត្រូវជាបងប្អូនជីដូនមួយគ្នា ចុះ​លេង​ទឹកស្រះ​បណ្តាល​ឲ្យ​លង់​ស្លាប់​

​បាត់ដំបង:​ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា នៅ​ថ្ងៃ​ទី​០៥​ ខែមីនា​ ឆ្នាំ​២០២២​ វេលា​ម៉ោង​១៨​និង​៣០​នាទី​ ស្ថិត​នៅ​ចំណុច​ដីចម្ការ​ក្រុម​ទី​០៣​ ភូមិ​តាំងយូ​ ឃុំ​អូរ​ដា​ ស្រុក​កំ​រៀង​ ខេត្តបាត់ដំបង​ មាន​ករណី​ក្មេង​ប្រុសស្រី​ចំនួន​០២​នាក់​ លង់ទឹក​ស្រះ​ស្លាប់​បាត់បង់​ជីវិត ​។​ ជន​រង​គ្រោះ​ទី​១.​ឈ្មោះ​ ហេង​ លី​ហួ​ ភេទ​ប្រុស​ អាយុ​ ០២​ឆ្នាំ​ និង​ទី​២.​ឈ្មោះ​ ហេង​ ធា​រី​ ភេទ​ស្រី​ អាយុ​ ០៤​ឆ្នាំ​ ត្រូវជា​បងប្អូន​ជីដូនមួយ​នឹង​គ្នា​ រស់នៅ​ក្រុម​ទី​០៣​ ភូមិ​តាំងយូ​ ឃុំ​អូរ​ដា​ ស្រុក​កំ​រៀង​ ខេត្តបាត់ដំបង​។​

​តាម​ការ​បំភ្លឺ​ឈ្មោះ​ រឿ​ន​ ស្រី​ល័​ក្ខ​ ភេទ​ស្រី​ អាយុ​២០​ឆ្នាំ​ មុខរបរ​ កសិករ​ ត្រូវជា​ម្ដាយ​រង​គ្រោះ​បាន​ប្រាប់​ឲ្យ​ដឹង​ថា​ នៅ​ថ្ងៃ​កើតហេតុ​ វេលា​ម៉ោង​១៧​និង​៣០​នាទី​ គាត់​បាន​ដាំបាយ​ធ្វើ​ម្ហូប​នៅ​ច​ង្ក្រា​ន្ត​បាយ​ ហើយ​ឪពុក​ម្ដាយ​របស់​គាត់​អង្គុយ​លេង​ខាង​មុខ​ផ្ទះ​ ចំណែក​កូន​និង​ក្មួយ​នាំ​គ្នា​រត់​លេង​ខាង​មុខ​ផ្ទះ​ ។​ លុះដល់​ម៉ោង​១៨​និង​២០​នាទី​ ពេល​ធ្វើ​ម្ហូប​រួចខ្លួន​ដើរទៅ​ខាង​មុខ​ផ្ទះ​សួរ​ម្ដាយ​ថា​ឃើញ​កូន​ខ្ញុំ​អត់​ គាត់​ថា​អត់​ឃើញ​ទេ​ខ្លួន​ឮ​សូរ​សំឡេង​កូនស្រី​របស់​ខ្លួន​យំ​នៅ​មាត់​ស្រះ​ គាត់​ក៏​រត់​ទៅ​មើលឃើញ​កូនប្រុស​និង​ក្មួយ​ស្រី​អណ្ដែត​ទឹក​ស្លាប់​បាត់​ទៅ​ហើយ​ ។​

ក្រោយ​ពី​ទទួល​បាន​ព័ត៌មាន​ កម្លាំង​នគរបាល​ផ្នែក​ជំនាញ​សហការ​ជាមួយ​លោកគ្រូ​ពេទ្យ​ជំនាញ​ បាន​ចុះ​ត្រួតពិនិត្យ​និង​វិភាគ​ទីកន្លែង​កើតហេតុ​លើ​ក្មេង​ប្រុស​ស្រី​ទាំង​ពីរ​នាក់​ខាងលើ​ ពិតជា​លង់ទឹក​ស្រះ​ស្លាប់​ពិតប្រាកដ​មែន​ ។​

​បច្ចុប្បន្ន​ សាកសព​ជន​រង​គ្រោះ​ត្រូវ​បាន​ប្រគល់​ជូន​ទៅ​ឲ្យ​ក្រុម​គ្រួសារ​ យក​ទៅ​ធ្វើបុណ្យ​តាម​ប្រពៃណី ​៕

មតិយោបល់