កំពង់ស្ពឺៈ យោងតាមផេករបស់អគ្គស្នងការដ្ឋាននគរបាលជាតិបានឲ្យដឹងថា បុរស២នាក់បានស្លាប់ខណៈជិះម៉ូតូបុកគ្នាពេញទំហឹងនៅលើផ្លូវជាតិលេខ៤(៣៧-៣៨)ត្រង់ចំណុចភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ នៅថ្ងៃទី១៣ ខែមីនា ឆ្នាំ២០២២ វេលាម៉ោង១៤និង៤៥នាទីរសៀល។
តាមការបញ្ជាក់ពីសមត្ថកិច្ចបានអោយដឹងថាមុនពេលកើតហេតុមានម៉ូតូ១គ្រឿងម៉ាកហុងដាសេ១២៥សេរី២០១៤ពណ៌ខ្មៅពាក់ស្លាកលេខកំពង់ស្ពឺ1G-1499អ្នកបើកបរឈ្មោះមឿន បញ្ញា ភេទប្រុស អាយុ១៩ឆ្នាំ រស់នៅភូមិក្រាំងពង្រ ឃុំវល្លិ៍សរ ស្រុកសំរោងទង ខេត្តកំពង់ស្ពឺ បើកបរពីទិសខាងកើតទៅទិសខាងលិចលុះមកដល់ចំណុចខាងលើបានបុកជាមួយម៉ូតូមួយគ្រឿងម៉ាកហុងដាសេ១២៥សេរី២០២១ពណ៌ខ្មៅពាក់ស្លាកលេខកំពង់ស្ពឺ1N-9627អ្នកបើកបរឈ្មោះយ៉ន សុខលីម ភេទប្រុស អាយុ១៨ឆ្នាំ រស់នៅភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ដែលកំពុងបើកបរឆ្លងផ្លូវពីទិសខាងជើងទៅទិសខាងត្បូងបណ្តាលអោយអ្នកបើកបរម៉ូតូទាំង២នាក់ស្លាប់នៅនឹងកន្លែងកើតហេតុ។ក្រោយពីកើតហេតុរួចសមត្ថកិច្ចបានធ្វើការវាស់វែងដោយសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។
ចំពោះវត្ថុតាងម៉ូតូទាំង២គ្រឿងសមត្ថកិច្ចបានយកទៅរក្សាទុកនៅប៉ុស្តិ៍នគរបាលរដ្ឋបាលត្រពាំងគងដើម្បីកសាងសំណុំរឿងទៅតាមនីតិវិធី៕