បាត់ដំបងៈ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា នៅថ្ងៃទី១៦ ខែមីនា ឆ្នាំ២០២២ វេលាម៉ោង ១៤ និង២០នាទី ត្រង់ចំណុចក្រុមទី០៧ ភូមិរំចេក១ សង្កាត់រតនៈ ក្រុងបាត់ដំបង ខេត្តបាត់ដំបង កម្លាំងជំនាញផ្នែកប្រឆាំងគ្រឿងញៀន នៃអធិការដ្ឋាននគរបាលក្រុងបាត់ដំបង សហការជាមួយ កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តបាត់ដំបង បានចុះបង្រ្កាបករណីរក្សាទុក ជួញដូរ ចែកចាយ ដោយខុសច្បាប់នូវសារធាតុញៀន ០១ ករណី ក្នុងបទល្មើសជាក់ស្តែង។

មន្ត្រីនគរបាលក្រុងបាត់ដំបងបានឲ្យដឹងថា ៖ ជនសង្ស័យទាំង០៣នាក់ រួមមាន ៖ ១.ឈ្មោះ សុខ ស្រីណី ភេទស្រី អាយុ១៦ឆ្នាំ មានទីលំនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។ ២.ឈ្មោះ ទួត ម៉ាត់រ៉ាសុីល ភេទប្រុស អាយុ២២ឆ្នាំ មានទីលំនៅភូមិរំចេក១ សង្កាត់រតនៈ ក្រុងបាត់ដំបង ខេត្តបាត់ដំបង និង៣.ឈ្មោះ ផូ ភក្តី អាយុ២៥ឆ្នាំ មានទីលំនៅភូមិព្រែកហ្លួង ឃុំព្រែកហ្លួង ស្រុកឯកភ្នំ ខេត្តបាត់ដំបង។

ចំណែកឯវត្ថុតាងរួមមាន៖-ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន ២៨កូនថង់ ។-ថ្នាំញៀនប្រភេទមេតំហ្វេតាមីន (យ៉ាម៉ា WY) ចំនួន ០៥គ្រាប់ ។-ទូរស័ព្ទដៃ ០៤គ្រឿង (ចាស់) ។ -កាំបិតដាវចំនួន ០៦ដើម។ -ម៉ូតូ ០១គ្រឿង ម៉ាកហុងដាឌ្រីម ពណ៌ខ្មៅ សេរីឆ្នាំ២០២១ ពាក់ស្លាកលេខ បាត់ដំបង 1AG-8722 ។ -សំភារៈសំរាប់ប្រើប្រាស់ថ្នាំញៀនមួយចំនួន ។

បច្ចុប្បន្ន សមត្ថកិច្ចនគរបាលបានរៀបចំបញ្ជូនសំណុំរឿងវត្ថុតាង និងជនស័ង្សយទាំងបីនាក់ មកកាន់ការិយាល័យជំនាញ ខេត្ត ដើម្បីអនុវត្តបន្តតាមនីតិវិធី ៕