-

រន្ធត់ណាស់! រថយន្ត​ពីរ​គ្រឿងបុកគ្នាពេញទំហឹង ​បណ្តាល​ឲ្យ​មនុស្ស៣​នាក់​រង​របួសធ្ងន់​ស្រាល​ ​

​ពោធិ៍សាត់: យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា គ្រោះថ្នាក់​ចរាចរណ៍​មួយ​បាន​កើតឡើង ​នៅ​លើ​កំណាត់​ផ្លូវជាតិ​លេខ​៥​ រវាង​រថយន្ត​កាម​រី​មួយ​គ្រឿង​ បាន​ប៉ះទង្គិច​ជាមួយ​រថយន្ត​ប្រភេទ​ហុ​កឡ​មួយ​គ្រឿង​ ខណ:​កំពុង​ធ្វើ​ដំណើរ​បញ្ច្រាសទិស​គ្នា​ បណ្ដាល​ឲ្យ​ក្រឡាប់​ផ្ងារជើង​ ធ្វើ​ឲ្យ​មនុស្ស​៣​នាក់​រង​របួសធ្ងន់​ស្រាល​ ។​

​ហេតុការណ៍​នេះ​បាន​កើតឡើង ​នៅ​វេលា​ម៉ោង ​១០ ​និង ​៤៥ ​នាទី​ព្រឹក​ ថ្ងៃ​ទី​២៥​ ខែមីនា​ ឆ្នាំ​២០២២​ ត្រង់​ចន្លោះ​គីឡូម៉ែត្រ​លេខ​ ១៧៨-១៧៩​ ស្ថិត​ក្នុងភូមិ​ស្រះស្រង់​ សង្កាត់​ព្រៃ​ញី​ ក្រុង​ពោធិ៍សាត់​ ខេត្តពោធិ៍សាត់​ ។​

​នគរបាល​ចរាចរណ៍​ក្រុង​ពោធិ៍សាត់​ បាន​និយាយ​ប្រាប់​ថា​​ មុន​ពេល​កើតហេតុ​មាន​រថយន្ត​កាម​រី​ចង្កូត​ស្តាំ​ ពណ៌​ទឹកប្រាក់​ ពាក់​ស្លាក​លេខ​បាត់ដំបង​ 2A-4025​ ធ្វើ​ដំណើរ​ពី​លិចទៅ​កើត​ ។​ លុះ​មក​ដល់​ចំណុច​ខាងលើ​ក៏​បាន​បត់​ទៅ​ខាងឆ្វេង​ដៃ​ចូល​ផ្លូវ​ វត្ត​កែវ​មុន្នី​ ស្រប​ពេល​ជាមួយ​គ្នា​ក៏​មាន​រថយន្ត​មួយ​គ្រឿង​ទៀត​ប្រភេទ​ហុ​កឡ​ ពណ៌​ខៀវ​ ពាក់​ស្លាក​លេខ​ កំពង់ឆ្នាំង​ 3A-1714​ ធ្វើ​ដំណើរ​បញ្ច្រាសទិស​គ្នា​ ជ្រុល​បុក​រថយន្ត​កាម​រី​ បណ្ដាល​ឲ្យ​រថយន្ត​ហុ​កឡ​ក្រឡាប់​ផ្ងារជើង​ ឯ​រថយន្ត​កាម​រី​ខ្ទាត​ទៅ​ម្ខាង​រង​របួស​ ធ្ងន់​ម្នាក់​ឈ្មោះ​ សាន់​ សួង​ ភេទ​ប្រុស​ អាយុ ​៣៩ ​ឆ្នាំ ​ជា​អ្នកបើកបរ​ រួម​ទាំង​ប្រពន្ធ​និង​ម្នាក់​ទៀត​របួសស្រាល​ ដោយ​អ្នក​ទាំង​បី​នៅ​ភូមិ​កើតហេតុ​ខាងលើ​ ត្រូវ​បញ្ជូន​ទៅ​មន្ទីរពេទ្យ​ខេត្ត​ ។​

​សមត្ថកិច្ច​ជំនាញ​ឲ្យ​ដឹង​ថា​ ក្រោយ​កើតហេតុ​អ្នក​បើករថយន្ត​ហុ​កឡ​រត់គេច​ខ្លួន​ ហើយ​កម្លាំង​ចរាចរណ៍​បាន​វាស់វែង​រួច​យក​វត្ថុ​តាង​រថយន្ត​ទាំង​ពីរ​ ដើម្បី​បន្ត​នីតិវិធី​ ៕

មតិយោបល់